Түркістандық полицейлер ерекше форум өткізді. Жастарға арналған іс-шара әдеттегі жиналыс форматында емес, әсерлі көрініспен, мағыналы бейнероликтің көрсетілуімен және елімізге белгілі спикерлердің қатысуымен ерекшеленді. «Тәртіпті жастар — қауіпсіз қоғам» атты форум жастарды ұлтжандылыққа, отанды құрметтеуге бағытталған.
Түркістан қалалық полиция басқармасы қоғамдағы құқық бұзушылықты азайту жұмыстарын жүргізуде жастарға көңіл бөлінуде. Себебі, кез-келген мемлекеттің ең белсенді бөлігі, қоғамның қозғаушы күші – жастар. Қазіргі таңда жасөспірімдер арасындағы құқық бұзушылықтың алдын алу қоғамның алдында тұрған басты міндеттердің бірі. Құқық қорғау органдарының негізгі қызметі – кәмілетке толмағандардың арасындағы құқық бұзушылықтың алдын алу және болдырмау, құқықтық сауаттылықты арттыру, заңсыз іс-әрекеттер жасаудан қорғау, жас ұрпаққа заңға бағынушы азамат ретінде құқықтық тәлім-тәрбие беру. Ал, осы тұста рухани мекен Түркістан қаласының жастары еліміздің өзге өңірлеріне үлгі бола алуы керек. Түркістандық тәртіп сақшылары жастарға арналған форумды ерекше форматта өткізіп, патриоттық сезімді арттыратын іс-шара ұйымдастырды. Қожа Ахмет Ясауидің жастарға арналған сөзімен басталған жиын, тарихтағы қоғам қайраткелерінің өсиетін жеткізген қойылыммен ашылды.
Айта кетейік, облыс орталығындағы 14 пен 35 жас аралығындағы жастар саны 70 256. Бұл қала тұрғындарының шамамен үштен бір бөлігін құрайды. Түркістан қаласының әкімі Нұрбол Тұрашбеков өз баяндамасында қаланың рухани астанаға айналуы жолында жастарға артылар міндеттің салмақты екенін айтып, еңбек, білім және тәрбие тақырыптарының маңыздылығын тарқатып өтті.
Қала прокуроры Каукен Нәрікбаев өз кезегінде 2019 жылдан бастап «Түркістан — қауіпсіз қала» бағдарламасы бекітіліп, бүгінде үшінші кезеңі жүзеге асып жатқанын атап өтті. Бағдарлама аясында зорлық-зомбылық құрбандарына қолдау көрсету жөніндегі «Дағдарыс» орталығы құрылған, мектептер бейнекамералармен, ішкі санитарлық жүйемен қамтамасыз етілген. Жол қауіпсіздігін сақтау бойынша рейдтік іс-шаралар тұрақты ұйымдастырылып, мектептерде құқық қорғау, төтенше жағдайлар, медицина, психолог мамандарының қатысуымен кездесулер өткізілген екен.
Жиынның мазмұнын ел арыстарының сахналанған монологы аша түсті. Елімізге белгілі, білікті актерлер сомдаған Ахмет Байтұрсынов, Мұхтар Әуезов, Міржақып Жулатов, Жүсіпбек Аймауытов және Алихан Бөкейхановтың бейнелері мен олардың айтқан сөздері әрбір көрерменге ерекше әсер етпей қоймыды. Қойылым соңында Алаш арыстарының атынан Түркістан жастарына кітап аманатталды.
«Тәртіпті жастар – қауіпсіз қоғам» форумының маңыздылығын Полиция басқармасының басшысы Бауыржан Жанаев өз сөзінде баяндап, бейнероликпен түсіндірді. Сонымен қатар, қаладағы қылмыстық ахуал жөнінде баяндама жасап, жастарға заңды білмеу — жауапкершіліктен құтқармайтынын жеткізді.
Форумға спикер ретінде шақырылған Қазақстан Республикасы Парламенті Мәжілісінің депутаты Берденов Руслан Арысбекұлы, кәсіпкер, Қазақстан Республикалық “Qazaqstan team” жастар бірлестігінің жетекшісі, ұлттық Құрылтайдың мүшесі, ҚР Президенті жанындағы Жастар саясаты жөніндегі кеңес төрағасының орынбасары, Мемлекеттік «Дарын» жастар сыйлығының лауреаты, Олжас Сүлейменов, ақын, жазушы, аудармашы Абай Батырұлы Қалшабек арнайы түрік әлемінің рухани-мәдени орталығы атанған Түркістанды еліміздегі ең қауіпсіз қоғам ету төңірегінде өздерінің пікірлерін жеткізді. Жастарды білімге құштар болуға, спортпен шұғылдануға, руханият орталығының мәртебесіне лайықты, өнегелі жастар болуға шақырды.
“Алаш тобы” рухты ән шырқап, қатысушыларға керемет әсер сыйлады. Кешті облыстық ақсақалдар ұйымының төрағасы Жарылқасын Әзіретбергенов қорытындылап, жастарға бата берді.
