Сайрам ауданы Қарабұлақ ауданындағы мал сою пунктерінде қалдықтар ветеринариялық талаптарға сәйкес жойылмайды, деп хабарлайды Түркістан облысы әкімінің баспасөз қызметі.
Сайрам ауданы бойынша 21 мал сою бекеті бар. Оның ішінде Қарабұлақ ауылы 11 мал сою орнымен қамтамасыз етілген. Олардың көбі заман талабына сай емес. Бұл эпизоотиялық және эндемиологиялық жағдайды ушықтыруы мүмкін.
Аудандық ветеринариялық инспекцияның мәліметіне сүйенсек, Қарабұлақ ауданы бойынша мал сою орындарында тәулігіне орта есеппен 710 ірі қара, 405 жылқы, 1 800 уақ мал сойылады. Алайда, Қарабұлақ ауылында орналасқан мал сою алаңдарында жыл сайын малдың қалдықтары ветеринариялық талаптарға сәйкес жойылып жатқан жоқ.
Осы орайда, облыс әкімі Дархан Сатыбалды жұмыс сапарымен Сайрам ауданында болып, мал бордақылау алаңдары мен мал сою бекеттерінің жұмыстарын ретке келтіру бойынша жұмыс тобын құру, туындаған мәселені шешу жөнінде тапсырма берген болатын.
Жұмыс тобы осы мәселе бойынша бірнеше заң бұзушылықтарды анықтап, аумақтық инспекция тарапынан 9 мал сою орнына 414 000 теңге көлемінде айыппұл салынды. 3 мал сою орнының иелері мал сою бекеттерін елді мекеннен сыртқа шығаруға, алаңдарын өз еркімен жабуға келісімдерін берді.
Аталған мәселені шешу мақсатында бірқатар ұсыныс қарастырылып отыр. Олар: инсенератор пештері арқылы мал қалдықтарын кәдеге жарату, қалдықтарды тастайтын Беккари шұңқырларын салу, төрт түліктің жүндері мен терілерін өңдеу және ауыл мал қалдықтарын қайта өңдеу, ет өңдеу және кәдеге жарату.
Жұмыс тобы жеке кәсіпкерлермен бірнеше рет жиналыс өткізді. Нәтижесінде, жеке кәсіпкер өз қаражаты есебінен Қарабұлақ ауылдық округінде орналасқан барлық мал сою орындарынан шыққан қанды төгетін Беккари шұңқырын дайындап, одан бөлек инсенератор пешін орналастыру бойынша жұмыс істейтін болып келісілді.
