Шымкентте 2024 жылы 600 млн теңгеге дағдарыс орталығы бой көтереді деп жоспарлануда. Бұл туралы қалалық Полиция департаментінде өткен «қоғамдық қауіпсіздік тұжырымдамасын іске асырудың жоспарын» талқылау барысындай айтылды. Алайда мамандар қала аумағандағы 5 ауданнан да ашуды ұсынды.
Бүгін, Шымкент қаласы Полиция департаментінде Мемлекет басшысының тапсырмасын жүзеге асыру мақсатында «Қоғамдық қауіпсіздікті қоғаммен серіктестікте қамтамасыз етудің 2024-2028 жылдарға арналған тұжырымдамасын іске асыру» бойынша іс-қимыл жоспары талқыланды. Консультативтік кеңес отырысында Шымкент қаласы ПД-нің бастығы полиция генерал-майоры Қайрат Дәлбеков өзі төрағалық етіп, баяндама жасады.
Мегаполистің бас полицейі соңғы кездері ең өзекті мәселеге айналып отырған интернет-алаяқтық, тұрмыстық зорлық-зомбылық және есірткі қылмыстарының себеп салдары мен статистикасына жеке дара тоқталып, алдын алу шараларын күшейту қажеттігін атап айтты. Қазіргі таңда Шымкент қаласында халық саны жыл санап артуда. Алайда, тұрмыстық зорлық-зомбылық та көбеймесе азаяр емес. Бүгінде дағдарыс орталығын паналаушылар үшін орын санының жетіспеушілігі байқалады екен. Осы мәселені шешу мақсатында қоғамдық қауіпсіздік тұжырымдамасын іске асырудың жоспарында 2024 жылы 600 млн теңгеге бір орталық ашу көзделген . Жиынға қатысқан қалалық білім басқармасының басшысы Жанат Тажиева дағдарыс орталығын 5 ауданнан ашуды ұсынды.
Одан бөлек жиында интернет-алаяқтық, есірткі қылмысы мен жол апаты жағдайларының алдын алуға және полиция қызметінің сапасын жақсартуға арналған 5 жылдық жоспарды назарға ұсынды. Айта кетейік бүгінгі жиынға қала әкімінің бірінші орынбасары Қуаныш Асылов, қала прокурорының орынбасары Бахтияр Мухамеджан, мәслихат хатшысы Бахадур Нарымбетов, қылмыстық атқару жүйесі департаменті мен төтенше жағдай жөніндегі департамент басшылары, экономика, білім беру, денсаулық сақтау басқармалары, мемлекеттік емес ұйымдар мен консультативтік кеңесші орган мүшелері және баспасөз тілшілері де қатысты.
Бұл туралы Айғақ-ақпарат хабарлайды.
