Ала допты жанына серік еткен мегаполистің жас футболшылары арасында турнир өтті. Теңбіл доп тартысын ұйымдастырған — «FGS-Болашақ ұрпақ мектебі». Жастарды алаңда алға шығаруды мақсат еткен сайыста салауатты өмір салты насихатталды, Жеңісті жақындатқан батырлардың ерлігі айтылды.
Денсаулық — зор байлық, ұрпақ саулығының негізі. Қанатты сөзді темірқазық еткен FGS-Болашақ ұрпақ мектебі шымкенттегі 6-7 сынып оқушылары арасында футболдан турнир ұйымдастырды. Шаһардың 10 білім ұясы қатысқан сайыс — үлкен додалардың бастауы болмақ. Өйткені, қазір ала доп шеберлері, спорттың бұл түріне қызығушылардың саны өте көп. Жарысты ұйымдастырушылар осыны ескере отырып, жас балалардың жігерін шыңдағымыз келеді дейді.
Төлеген Тәжібаев атындағы №47 мектептің алаңында өткен футбол ойыны тартысты болды, төрешіге өзара мықтыны анықтау оңайға соқпады. Аяқ допшылар қызықты да тартысты ойын өрнегін көрсетті. Жаттықтырушылар бұл сайысқа қатысты пікір білдіріп, маман ретінде бағасын берді.
Ойын нәтижесі бойынша жеңісті Пушкин атындағы №1 білім ұясы алды. Ал жүлделі 2,3-ші орынды 29, 36-шы мектептер бөлісті. «FGS-Болашақ ұрпақ мектебі ұйымдастырған турнир қорытындысы бойынша жеңіске жеткен командалар марапатталып, кубок табысталды. Салауатты өмір салтын насихаттайтын сайысқа демеуші болған жеке кәсіпкер Ақылжан Тасқымбаев бас жүлдені алған командаға 50 мың теңгені табыстады.
Турнир басынан-ақ ерекше ептілік пен өзгеше ойын өрнегін көрсеткен №29 мектептің оқушысы Усман … «Ең үздік ойыншы» номинациясын алды. Сайыстың тартысты өткенін айтқан футболшы қарсыластарының мықты екендігін жасырмады. Жеңіс күні қарсаңында жас спортшыларға патриоттық рух сыйлаған, шаршы алаңда шеберлігін шыңдаған турнир алдағы уақытта да жалғасын табатын болады.
