Биыл бірқатар ауқымды теміржол жобалары жүзеге асырылмақ. Бұл туралы Премьер-Министрдің бірінші орынбасары Роман Скляр мәлім етті.
«Кейінгі 3 жылда 8 мың шақырымнан астам республикалық маңызы бар жолдар салынды әрі жөнделді, сондай-ақ 9,5 мың шақырымнан астам жергілікті маңызы бар жолдар жөнделді. Нәтижесінде, стандартты жағдайдағы жолдардың үлесі республикалық желіде 91 процентке дейін, жергілікті желіде 85 процентке дейін артты. 2023 жылы 7 мың шақырым республикалық маңызы бар жолды және 3 мың шақырым жергілікті желілерді қайта салу және жөндеумен қамту жоспарланған», — деді Р. Скляр Сенаттағы «Тиімді өңірлік саясат – еліміздің орнықты әлеуметтік-экономикалық дамуының негізі» тақырыбындағы парламенттік тыңдауда.
Оның айтуынша, Мемлекет басшысының 2029 жылға дейінгі сайлауалды тұғырнамасы аясында стандартты жағдайдағы республикалық маңызы бар автомобиль жолдарының үлесін 100% және жергілікті желідегі автомобиль жолдарының үлесін 95% процентке жеткізу міндеті қойылды.
Бұдан бөлек ол бірқатар ауқымды теміржол жобалары да жүзеге асырылатынын айтты.
«Жоспарланған шаралардың нәтижесінде транзит көлемі 30% пайызға артады. Жалпы, заманауи көлік инфрақұрылымын құру еліміздің транзиттік әлеуетін арттырып, аймақтардың байланысын жақсартады», — деді Үкімет басшысының бірінші орынбасары.
Бұдан бұрын хабарланғандай, Премьер-Министрдің бірінші орынбасары еліміздегі жылу электр станциялары мен электр желілеріне ревизия жүргізіліп жатқанын айтты. Бұл тексеру биылдың бірінші тоқсанында аяқталады.
2025 жылдың соңына дейін халықты ауыз сумен қамту 100 пайызды құрайды.
ҚазАқпарат
