Ордабасы ауданы, Бадам ауылдық округінде «Bokei» автоматтандырылған заманауи қыш зауыты ашылды, деп хабарлайды «Айғақ» ақпараттық порталы.
Индустрияландыру картасы аясында іске қосылған нысанның ресми ашылуына Түркістан облысы әкімінің бірінші орынбасары Арман Жетпісбаев, облыстық мәслихат хатшысы Қайрат Балабиев, Ордабасы ауданының әкімі Нұрбек Бадырақов пен кәсіпорын қызметкерлері қатысты.
2020 жылы басталған зауыт құрылысы ағымдағы жылдың шілде айында аяқталған болатын. Тәулігіне 100 мың дана қыш шығаруға қауқарлы зауытта 60 адам жұмыспен қамтылып отыр. Олардың орташа айлық жалақысы 200-250 мың теңгені құрайды. Жоба «Бизнестің жол картасы» мемлекеттік бағдарламасымен жеңілдетілген 6% қаржыландырылған. Жобаның жалпы сомасы – 3 млрд 200 млн теңгені құраса, жеке қаражаты есебінен 1 млрд 220 млн теңге жұмсалған.
Зауыт толығымен заманауи жабдықтармен жабдықталған. Қондырғылар Италия, Жапония, Франция, Ресей сияқты мемлекеттерде жасалынған.
Облыс басшысының орынбасары аталған өндіріс орнының әлеуетінің зор екенін, зауыт өнімін Түркістан облысынан бөлек еліміздің барлық аймақтарына жөнелтуге қауқарлы екенін айтып, инновациялық жобаларға мемлекет тарапынан қашанда қолдау көрсетілетінін жеткізді.
