Елімізде 2011 жылы «Медиация» туралы заң қабылданғалы 5 тамыз Республикалық «Медиация» күні ретінде аталып өтуде. Шымкент қалалық Қазақстан Халқы Ассамблеясы құрамында 17 этномәдени бірлестік бар. Атаулы мерекеге орай, мегаполисімізде түрлі шаралар да өтіп жатыр. «Достық үйі» ғимаратында қалалық этномәдени бірлестіктердің төрағаларымен жүздескен Марат Әзілханов қоғамдық-саяси тұрақтылықты қамтамасыз ету жайын баяндап, өкілдердің атқарған жұмыстарына алғысын білдірді.
Қазақстанда соңғы жылдағы санақ бойынша 140-тан астам түрлі ұлт бар. Миллионды қалада өткен басқосуда қалалық түрік этномәдени бірлестігінің төрағасы Латифша Асанов өз кезегінде сөз алып, қоғамдық келісім мен мемлекеттіс саясат аясында атқарылып жатқан жұмыстарды қорытындылады.
Келелі кездесу мұнымен біткен жоқ. Қала әкімінің бірінші орынбасары жүргізген жиынның екінші бөлімі БАҚ өкілдерімен пікір алмасумен жалғасты. Марат Әзілханов журналистер мен блогерлермен бас қосып, еркін форматта әңгіме-дүкен құрды. Кездесу барысында жастарға арналған тәрбиелік маңызы бар ақпараттық контенттерді көбейту, этностарды біріктіру, ақпараттық кеңістік саласында жүйесіздікті жою тақырыптары қозғалды.
Бүгінде миллионды мегаполисте 123 баспа ақпарат құралдары, 5 телеарна, 2 радио және 47 ақпараттық портал жұмыс жасауда. Еліміздегі барлық этностардың тілін, мәдениетін, қалыптасқан дәстүрін дамытуда атқарылған жұмыстар да біршама. Жиында журналистер қоғамдық келісімді нығайтуда өз ұсыныстарын білдіріп, ақпараттық саясатты дамытуға үлес қосуға ниетті екендігін жеткізді. Қалалық Ассамблея жанынан құрылған Журналистер мен блогерлер клубының атқарып жатқан жұмыстары туралы клубтың жетекшісі баяндады.
