Түркістан облыстық мәслихатының кезектен тыс XVI сессиясы өтті. Отырыс басталмас бұрын, жақында өмірден озған Өмірзақ Мелдехановты әріптестері бір минут үнсіздікпен еске алды.
Он алтыншы сессияның күн тәртібіне енгізілген маңызды 7 мәселенің негізгілері — өткен жылғы облыстық бюджеттің атқарылуы туралы тексеру комиссиясының есебі, Ө. Мелдехановтың депутаттық өкілеттігін мерзімінен бұрын тоқтату, тұрақты комиссиялардың төрағаларын сайлау шешіміне өзгерістер енгізу, “Түркістан облысының Құрметті азаматы” атағын беру.
Сессия алдындағы тұрақты комиссиялардың қарауына түскен бұл мәселелер жиында бір ауыздан мақұлданып, тиісті шешімдер қабылданды.
Сонымен, Түркістан облыстық мәслихатының мемлекеттік-құқық мәселелері және жергілікті өзін-өзі басқару жөніндегі тұрақты комиссияның төрағалығына Кеңес Әуен сайланды.
Түркістан облысының “Құрметті азаматы” атағы — қоғам қайраткері Сауытбек Абдрахмановқа, Қ.А.Ясауи атындағы Халықаралық қазақ-түрік университетінің профессоры Құлбек Ергөбекке және еңбек ардагері Базарбек Уәлихановқа берілетін болды.
