КИНОИНДУСТРИЯНЫҢ ТАЛАНТТАРЫ МАРАПАТТАЛДЫ

 Киноиндустрияның жас таланттары Шымкентте бас қосты. Қоғамдық сананы тіктейтін, өмірдің өзінен алынатын ұлы өнер түріне отандық режиссерлерден бөлек, шетелдік авторлар да қатысты. Қала күніне орай ұйымдастырылған қысқаметражды фильмдер фестивалінде тек патриоттық туындылар ғана емес, бүгінгі күннің шымбайға бататын шындықтары да көрініс тапты.

 Кино әлемі бүгінгі күнде кез келген елдің мәдениет айнасына айналып үлгерді. Жаһандану кезеңінде бала тәрбиелеуде көгілдір экраннан келетін әрбір туындының маңызы зор. Бүгінде жастар арасында кітап бетіне үңіліп отырудан қарағанда, тарих беттеріне сіңген шынайы оқиғаларды кинофильмдер мен мультфильмдерден қарауға қызығушылық артып отыр. Осы мақсатта ұйымдастырылған Shymkent Nomad Film Fest атты қысқаметражды фильмдер байқауы Шымкентте Жастар ресурстық орталығында қорытындыланды. Байқаудың мақсаты киноиндустрия саласына үлкен мән беріп, жас талант иелеріне қолдау көрсету. Шараға қатысқан Шымкент қаласы әкімінің бірінші орынбасары Шыңғыс Мұқан жас таланттарды құттықтап, шығармашылық табыс тіледі. Байқауда арнайы ережеге сәйкес 20 туындының ішінен 10-ы іріктеліп, көрермен назарына ұсынылды. Екінші рет өткізіліп отырған фильмдер фестиваліне Қарақалпақстан мен Өзбекстан елдерінің де режиссерлері тарапынан қызығушылық туындап, бірнеше өтінімдер түскен.

Дарын иелерінің туындыларына оң бағасын берген әділ-қазылар алқасында көрерменнің жүрегінен орын алған фильм режиссерлері де бар. Байқау қатысушылары ұлттық мәдениетті сақтау, туризм, спорт, жемқорлық, отбасы құндылықтары және әлеуметтік мәселелерді қамти отырып, қысқаметражды фильмдер арқылы бүгінгі күннің өзекті тақырыптарына тоқталып өтті.

Жастарға қолдау көрсету мақсатында жасалған іс-шара қатысушылары Шымкент қаласы әкімінің бірінші орынбасары Шыңғыс Мұқанның арнайы дипломдарымен марапатталып, телевизор, ноутбук, моноблог сынды құнды сыйлықтарға ие болды:
Бас жүлде — “Бізбен бірге жарқын болашақта» фильмі
1- орын: “Ойлан» фильмі
2-орын: “Отау” фильмі
3-орын: “Қозға” фильмі