Түркияның Ыстамбұл қаласының Қазақстан Тәуелсіздігінің 30 жылдығына орай «Жаһандану өркениетіндегі қазақ әлемі» тақырыбында Қазақтардың кіші құрылтайы өтті.
Кіші Құрылтайды ҚР АҚДМ қолдауымен «Отандастар қоры» Дүниежүзі қазақтары қауымдастығымен бірлесіп ұйымдастырды, — деп хабарлайды Қазақстан Республикасы Ақпарат және қоғамдық даму министрлігінің баспасөз қызметі.
Қазақтардың кіші құрылтайының жұмысына Түркия мен Еуропа елдеріндегі қазақ қауымдарының, Қазақстанның мәдениет мекемелері мен жоғары оқу орындарының 100-ден астам өкілдері қатысты.
Шара жұмысының аясында шетелдегі қазақ диаспораларының өзекті мәселелері бойынша нәтижелі пікір алмасу болды.
Кіші құрылтайдың бағдарламасы көптеген мәдени-ағарту іс-шараларын қамтыды.
Стамбул қаласының Бағдылжар ауданында белгілі спортшы Мұстафа Өзтүрік атындағы саябақтың ашылу салтанаты өтті. Кіші құрылтайға қатысушылар үшін қазақстандық музейлер мен жоғары оқу орындары «Алтын тамырлы Атажұрт» көрме, сондай-ақ Түркиядағы қазақ диаспорасының жастары үшін «Білім көрмесінің» тұсаукесері ұйымдастырылды.
Айта кетейік, Түркияда өтіп жатқан кіші құрылтайға Шымкент қаласынан және Түркістан облысынан делегация қатысуда.
Түркістан облысы мен Шымкент қаласынан құралған делегациялық топ құрамында Елбасының курстасы, КСРО Мемлекеттік сыйлығының иегері, Қазақстанның құрметті металлургі, Шымкент қаласының «Құрметті азаматы» Аманәлі Әбдіраманов, Түркістан облысының «Құрметті азаматы» Сексенбай Тұрысбеков пен Ордабасы ауданының «Құрметті азаматы» Махмұтбек Мұхамедов, Дүниежүзі қазақтары Қауымдастығының Шымкент қаласы және Түркістан облысы филиалдарының жетекшісі Дулат Әбіш және филиал жетекшісінің орынбасарлары Бегалы Мұхамедов пен Мұхит Көшеновтер бар.