Сарыағаш ауданында коронавирусқа қарсы екпе алып жатқан адамдардың саны артып келеді. Бүгінгі күнге дейін 36 мыңға жуық адам коронавирусқа қарсы екпе салдырды. Ауданда вакцинаның бірінші компонентін 35 675 адам ал, екіншісін 19 091 тұрғын қабылдаған. Бүгінгі таңда вакцинаның Гам-КОВИД-Вак, QazCovid, Hayat-Vax және КоронаВак түрлері өңірге жеткізіліп, аудан аумағындағы аурухана мен емханаларда, сондай-ақ шалғайдағы ауыл тұрғындарына жылжымалы медициналық кешен арқылы салынуда. Қазіргі таңда аудан аумағында 13 егу пункттері жұмыс атқаруда.
Сонымен қатар, 4 жылжымалы бригада арнайы дайындалған. Екпе салдыру үшін келген азаматтардың алдымен дене қызулары мен қан қысымдары өлшеніп, сауалнама парағы толтырылады. Екпе қабылдауға ешқандай қарсы көрсетілімдер болмаған жағдайда ғана вакцина салынады.Екпе салынғаннан кейін 30 минут дәрігер қадағалауында болу үшін медициналық бақылау аймағына жіберіп, мамандар вакцинадан кейінгі күтім мен сақтық шаралары туралы түсіндірме жұмыстарын жүргізуде.
Түркістан облысының Өңірлік коммуникациялар қызметі
