ШЫМКЕНТ ҚАЛАСЫНДА СИМУЛЯЦИЯЛЫҚ ОРТАЛЫҚ АШЫЛДЫ

Шымкент қаласында симуляциялық орталық ашылды, деп хабарлайды Айғақ-ақпарат. Қазақстанның өзге қалаларында мұндай орталық болғанымен, жоғары техналогиялармен жабдықталған жалғыз орталық осы Шымкент қаласында ашылып отыр.

Жедел жәрдем қызметкерлері енді медициналық көмек көрсетуді теория жүзінде оқып қана қоймай, манекендер арқылы іс-тәжірибе жасап көре алады.  100 манекенмен қамтылған мұндай кабинет еліміздің ешбір қаласында болмаған.

Шымкент қаласында 10 жедел жәрдем станциясы бар. Онда түрлі санаттағы 1700 дәрігер халыққа қызмет көрсетеді. Бұған дейін мекемеде іс-тәжірибе жүргізуге арналған екі ғана муляж болған екен. Бүгінде Шымкент қаласы миллионды мегаполис болғандықтан ең алдымен медицина саласының дамуы өте маңызды. Сондықтан қаладағы адам өлімінің көрсеткішін төмендету мақсатында жедел жәрдем станциясына жаңа заманауи құрылғылар әкелінді. Нақтырақ айтсақ, түрлі дәрежедегі жарақаттар алған адам кейіпіндегі манекендер. Бұл арқылы дәрігерлер алғашқы көмек көрсетуді толық үйреніп, қолдарын жаттықтыратын болады. Мүсіндер Түркия елінен әкелінген. Сапалы құрылғылар автоматтандырылған және цифрландырылған. Қалалық Денсаулық сақтау басқармасының басшысы Бақытжан Позиловтың айтуынша дәл осы муляждар жергілікті дәрігерлер үшін өте қажет дүние болған. 

Шымкент қаласында 2021 жылдың алты айында орын алған жол көлік оқиғаларынан 1500 адам ауыр-жеңіл жарақат алып, дәрігерлер көмегіне жүгініпті. Оқиға орынында бірнеше адам жарақат алған жағдайда жедел жәрдем станциясынан 3 немесе 4 көлікті жіберуге тура келеді. Бұл әрине артық жұмыс күші. Осындай жағдайларды реттеу мақсатында мекеме Қазақстанда бұрын-соңды болмаған 4 науқасқа арналған жедел жәрдем көлігін Түркия елінен алдыртқан екен. Көлік іші барлық алғашқы көмек көрсетуге қажетте құралдармен жабдықталған. Бұл әрине дәрігерлердің де жұмысын жеңілдететіні анық.

Айта кетейік, бұл жұмыстардың барлығы мемлекеттік-жекешелік әріптестік аясында жүзеге асқан.