Сарбаздар қызмет етуге кірісті

   «Менің алғашқы жауынгерлік қызметім!». Осы ұранмен Ұлттық ұланның  №66/98 әскери бөлімінің 200-ге жуық жас сарбазы алғашқы жауынгерлік қызмет етуге кірісті.  Екі айлық оқу-жаттығу, тәрбие курсынан өткен сарбаздардың қимылын тәжірибе барысында қарап, ерекше дарынымен көзге түскендері марапатталды. Миллион халқы бар қаланың тыныштығын қорғайтын Ұлттық ұлан сарбаздары. Көңілге  сенім, бойға жігер беретін, еңбегі ерен қызмет өкілі болу оңай емес. Біздің тыныш ұйқымыз үшін кірпік қақпай қырағылықпен ел күзететін сарбаздар бұл жолда үлкен жаттығудан өтеді. №66/98 әскери бөлімінің жауынгерлері де екі айлық тәжірибеден өтіп, Отан алдындағы борышын өтеуге дайын. Салтанатты шараға аталған әскери бөлімнің қызметкерлері, Ұлттық ұлан басшылығы, ардагерлер мен әскери оркестр  қатысты. Жаттығу барысында белсенділік танытып, топ жарған жауынгерлерге марапатты сыйлықтар табысталып, әскери ардагерлер алдағы қызметтеріне сәттілік тіледі. Бірнеше айда бой түзеп, сапқа тұрған жас сарбаздардың көзінен өзіне артылған жауапкершілікті жан-тәнімен сезінгенін, әскери антына адал екенін байқауға болады.

 «Қайратыңа – әдісіңді жолдас ет, Әдісіңе – ақылыңды жолдас ет»,-деген екен Бауыржан Момышұлы. Осы сөзді әскери өміріне мақсат қылып қойған жауынгерлер еліне қызмет етуге, борышын өтеуге сақадай сай.

Айғақ-ақпарат