Президент ұсынған 30 кітап

Мемлекет басшысы ұсынған 30 кітап аясында Шымкентте жас берендердің байқауы ұйымдастырылды. Айта кетейік, аталмыш бәйге өткен ғасырдың 1998 жылынан бері дәстүрлі түрде өткізіліп келеді. Мұндағы мақсат көрнекті ойды көрерменнің көз алдына кестелеп көрсететін көркемсөз оқу шеберлері арасынан кіл мықтыны анықтау. Әрі жастар арасында әлем және қазақ қаламгерлерінің әдебиеттегі шығармашылық мұрасын кеңінен насихаттап, кітап оқу мәдениетін қалыптастыру болып табылады.

Әдебиет алыптарының артында қалдырған асыл мұрасы шырқалар аламан додаға 35 үміткерден өтініш келіп түскен. Ал екінші кезеңге тек 13 қатысушы қатысуға мүмкіндік алған. Жас берендер байқауына 16-25 жас аралығындағы үміткерлер қатысты. Олар драмалық, прозалық және поэзиялық шығармадан үзінді оқып сынға түсті. Сондай-ақ, жастар арасынан талант иесін жазбай танып, қазылық етер қазылар алқасы да зейін қойып зерделей тыңдады.

Мегаполистің жасампаз жастары көркемсөз жанры бәйгесіне жанын салып, қара сөздің құдіретін көрерменге жеткізуге тырысты. Түпсіз ой мен буынсыз тілге еркіндік беріліп, киелі сахнада әдебиет алыптарының шығармаларынан сыр шертілді.

 Қасым-Жомарт Кемелұлы ұсынған 30 кітап қатарында Абай Құнанбайұлының өлеңдері мен қара сөздерінен бастап, Мұхтар Әуезовтің «Абай жолы», Әбіш Кекілбаевтың «Үркер» шығармасы бар. Сонымен қатар, Оралхан Бөкейдің орамды ойлары мен Мұқағали Мақатаевтың сезім себезгілеген шығармалары арқау болды. Байқау нәтижесінде аламан додадан оза шапқан жүйріктер арнайы диплом және бағалы сыйлықтармен марапатталды.

Айғақ-ақпарат