Шымкент қаласы Полиция департаменті Жылдам қимылдайтын арнайы жасағының взвод командирі Нұрлан Нұрсеитов қызмет бабында ғана емес спорт саласында да толағай табыстарды бағындырған. Құқық қорғау саласына да спортқа деген ынта-ықыласының нәтижесінде атбасын бұруға шешім қабылдаған. Бозбала кездегі қызығушылық уақыт өте келе оның кәсіби спортшы болып шыңдалуына септігін тигізген. 2000 жылдардан бастап аймақтық, республикалық сондай-ақ халықаралық додаларда топ жарған Нұрлан Жұмаханұлы бүгінде ізбасарлар тәрбиелеп, ұстаздық етіп келеді.
«Боксқа 2000 жылдары келдім. Қазақстанның екі дүркін күміс жүлдегері, үш дүркін қола жүлдегерімін. Универсиада чемпионатының чемпионымын. Сондай-ақ әскерилер арасындағы қоян-қолтық ұрыстан төрт дүркін және самбодан бір дүркін Қазақстан чемпионымын. Жалпы 20 жыл ішінде бірқатар жүлделі орындарды иемденіп, ел абыройын асқақтату үшін тер төгіп келемін» — дейді Нұрлан Нұрсеитов
Шын ер жеңсе, тасымас. Осындай халық даналығына сусындап өскен азамат өзінің мол тәжірбиесін ізбасарларына үйретіп, шәкірт тәрбиелеуден жалыққан емес. Мәселен Шымкент қаласы Полиция департаментінің қамқорлығына алынған №4 балалар үйінде ата-анасының қамқорлығынсыз қалған балаларға екі жылға жуық шеберлік сағаттарын ұйымдастырып, жастарды спортқа баулыған. Нәтижесінде жасөспірімдер спорт додаларында топ жарып, жарыстарда биік жетістіктерден көрініп келеді. Сала қызметкерінің айтуынша дәл осы бағытта, яғни бапкерлікті әрмен қарай дамытып жас буынның қалыптасуына демеу көрсету басты мақсатым дейді. Тәуліктің кез-келген уақытында тосын жағдайларға даяр болуды талап ететін қызметтегі жауапкершіліктен өзге, ұстаздық етуді қатар алып жүрген Нұрлан Жұмаханұлы сала қызметкерлеріне үлгі әрі ел мақтанышы десек артық болмас.
