«Smart Shymkent даму» форумы өтуде

«Smart Shymkent даму» форумы — еліміздің үшінші мегаполисін цифрландыру мәселесіне арналып отыр. Аталмыш жиында қазіргі заманға ақпараттық технологиялардың жетістіктерін мемлекеттік органдар жүйесіне, көрсетілетін қызметтер саласына ендірудің жолдары мен тәртібі талқыланады деп күтілуде.

«Smart Shymkent даму» форумында Қытай, Германия, Белоруссия мен Эстония елдерінен келген спикерлер IT-технология саласында өз ойларымен бөліседі. Бұдан басқа, аталмыш шарада озық технологиялардың жетістіктерін мемлекеттік органдар жүйесіне, көрсетілетін қызметтер саласына ендірудің жолдары мен тәртібі талқыланбақ.

Форумға ҚР Цифрлық даму, инновациялар және аэроғарыш өнеркәсібі вице-министрі А.Оспанов, Шымкент қаласының әкімі Е.Айтаханов пен Қазақстандық IT-қауымдастық өкілдері, Түркістан облысы мен қалалық жергілікті атқарушы органдардың өкілдері, ЖОО-ның басшылары қатысуда.

Шымкент қаласы әкімінің баспасөз қызметінің хабарлауы бойынша, Бүгінде мегпаолисте сыбайлас жемқорлық көріністерінің алдын алу мен мемлекеттік органдар жұмысының ашықтығын қамтамасыз ету мақсатында сыбайлас жемқорлық тәуекелі ең жоғары салалар мен әлеуметтік маңызды қызметтер болып есептелетін білім, денсаулық сақтау және сәулет, қала құрылысы салаларының қызметтері автоматтандырылған.

Қазір әрбір ата-ананың балабақшаның, мектептің қазіргі жағдайын ақпараттық жүйеден көре алу және электронды түрде өтініш жолдау мүмкіндігі бар. Сонымен қатар, кез келген тұрғын дәрігердің жұмыс кестесін ақпараттық жүйе арқылы көріп, оның бос уақытына сәйкес алдын ала жазылуына болады. Шымкент қаласында бұл жүйе қазіргі таңда толық жұмыс жасап тұр.
Форум барысында осы жұмыстарды одан әрі жалғастырудың жолдары мен тетіктері нақты талқыланып, қорытындысы бойынша шешу жолдары ұсынылатын болады. Сонымен қатар форумда Шымкент қаласын цифрландыру бойынша бірқатар ұсыныстар айтылып, нақты жүзеге асырылатын жаңа жобалардың таныстырылымы өтеді.