Түркістан облысының тұңғыш әкімі және кезінде Шымкент қаласын басқарған басшы «Айғаққа» эксклюзивті сұхбат берді. Жансейіт Түймебаев пен Дархан Сатыбалды Өзбекстан жерінде жүздесіп, Оңтүстік аймағын сағынышпен еске алды. Беделді қос азаматтар қазірде ел үшін еңбек етуде. Қазақстан Халқы Ассамблеясы Төрағасының орынбасары Түймебаев жұмыс сапарымен Ташкентке барып, Өзбекстандағы Елші Дархан Сатыбалдымен кездесті. Екі елдің достастығын нығайтатын шараға Түркістан облыстық мәслихатының депутаты, Ассамблея мүшесі Дулат Әбіш пен «Айғақ» телеарнасының шығармашылық ұжымы да қатысты.
Қазақстан Халқы Ассамблеясының қолдауымен ұйымдастырылған іс-шара рухани байлықты көтеруге бағытталған. Қазақстанның Өзбекстандағы жылдарымен байланысты. Көрші елдің астанасы Ташкентте екі күнге жоспарланған халықаралық конференцияға Нұр-Сұлтан қаласынан барған Жансейіт Қансейітұлы елшіліктің жаңа ғимаратымен танысты. Құрылысы ұзақ жылға созылған Қазақстанның Өзбекстандағы Елшілігі алдағы уақытта ресми түрде пайдалануға беріледі деп күтілуде.
«Орталық Азия — біздің ортақ үйіміз». Дәл осы тақырып аясындағы халықаралық конференцияның мақсаты — екі елдің достық жібін жалғастыру, Қазақстанда тұратын өзбек халқының фольклор кітабының тұсауын кесу. Осы мақсатта басқосқандар бірінші күні Елшінің қабылдауында болып, құрмет көрсетті. Екі тарап бір-біріне сый берді. Жансейіт Түймебаев Дархан Сатыбалдыға Қазақстан Халқы Ассамблеясының «Бірлік» медалін табыс етті.
Қабылдау кезінде әсерлі әңгіме айтылды. Еліміздегі Ассамблея Төрағасының орынбасары Жансейіт Қансейітұлы ауа-райы суық Нұр-Сұлтан қаласынан лебі ыстық Ташкентте жүріп, ерекше әсерін байқатты. Түркістан облысының тұңғыш әкімі болған жерлесіміз рухани аймаққа дұғай-дұғай сәлемін жолдап, сағынып жүрген сезімімен бөлісті.
Елшіліктің жаңа ғимаратының алдында ұлы ақын Абайдың ескерткіші бар. Дара тұлғаның бейнесі тұрған маңда елден барған делегация әңгіме құрып, естелікке суретке түсіп алды.
Осы сәтте Қазақстанның Өзбекстандағы Елшісі Дархан Амангелдіұлы да кезінде өзі әкім болған Шымкентті еске алып, жан жүрегімен тебірене мегаполис туралы пікірін білдірді. Жаңалықтан Шымкент десе, елең ете қаламын, қашанда тілекші болып отырамын дейді.
Қос күнге жоспарланған іс-шараның екінші күнінде «Орталық Азия — біздің ортақ үйіміз» тақырыбында конференция өтеді. Онда жан-жақтан келген мықтылар баяндама жасап, құнды кітаптың тұсауы кесілмек. Соңы мерекелік концертке ұласады.
«Айғақ» ақпарат
