Мегаполистің туған күніне орай бүгін Шымкентте автобус паркі ашылды. Бұл елдегі теңдессіз жоба. Мұнда ЖМС, сервистік орталық, автожуу қызметі бар. Жатақхана, медпункт және жүргізушілерге арналған асхана да қарастырылған. Айта кетейік, Шымкентке Қазақстанда құрастырылған 300 жаңа автобус жеткізілді. Олар салқындатқыштармен, пандустармен, бейнекамералармен, жолаушылар ағынының датчиктерімен, GPS-трекерлермен жабдықталған. Сондай-ақ, «Оңай» жол ақысын төлеудің электрондық жүйесін орнату жоспарлануда. Автобустар катафорезді пайдалана отырып шанақты коррозияға қарсы өңдеуді қоса алғанда, автокөлікке қойылатын барлық техникалық стандарттарға және қазіргі талаптарға сәйкес келеді. Жолаушылардың жалпы сыйымдылығы 56 адам, автобус ұзындығы 8,5 метр.
Айта кетейік, қазір қалада 27 көлік компаниясы жұмыс істейді. Күн сайын маршруттарға 1200 автобус пен шағын автобустар шығады, ал автопарктер қызметін 500 мыңнан астам жолаушы пайдаланады. Парктің жылжымалы құрамының 50%-дан астамы техникалық талаптарға сәйкес келмейді және пайдаланылғанына 10 жылдан астам уақыт өтіп кетті.
«Қазіргі таңда Шымкентте 27 көлік компаниясы жолаушылар тасымалымен айналысады, олардың тек 14-і ғана өз автобустары, қалғаны жалгерлік автобустар. Тасымалдау қауіпсіздігі, автобустар паркін жаңарту, мәдениет деңгейі және қызмет көрсету сервисі сияқты маңызды аспектілер бұл компанияларда жоқтың қасы деуге болады. Шымкенттегі жолаушылар тасымалының негізгі мәселелері:
* Жолаушыларға қызмет көрсету сапасының төмендігі
* Жүргізушілердің төмен мәдениеті мен сапасыз қызметі
* Автобустарда жолаушыларды нормадан артық толтыру
* Тасымалдау қауіпсіздігі
* Маршруттар кестесін сақтамау
* Маршрутқа тек қана қарбалас уақытта шығу
* Тиімді емес маршруттарға қызмет көрсетпеу
Электронды билеттеу жүйесін енгізу және муниципалдық автобус паркін пайдалануға беру қаладағы бірқатар маңызды проблемаларды шешуге мүмкіндік береді: мысалы, жол жүру ақысын көлеңкелі айналымнан шығару; ескірген қалалық автобустар паркін жаңарту; қалалық жолаушылар тасымалының сервисі мен қауіпсіздігк деңгейін арттыру; және қазіргі заманғы автобус паркінің өндірістік инфрақұрылымын құру», — деді «Shymkent» ӘКК АҚ Басқарма Төрағасы Рашид Аюпов.
