— «Ерұлан Кенжебекұлы Жамаубаев Қазақстан Республикасы Президентінің көмекшісі болып тағайындалсын», — делінген Жарлықта. Ол Қазақстан Республикасы Президенті Әкімшілігінің Әлеуметтік-экономикалық мониторинг бөлімінің меңгерушісі қызметінен босатылды.
Сондай-ақ, Мемлекет басшысының Жарлығымен Тимур Мекешұлы Жақсылықов басқа жұмысқа ауысуына байланысты Қазақстан Республикасы Президентінің көмекшісі қызметінен босатылғаны хабарланып отыр. Ерұлан Кенжебекұлы Жамаубаев 1974 жылы туған. 1995 жылы Қазақ мемлекеттік басқару академиясын, 2009 жылы Т.Рысқұлова атындағы Қазақ экономика университетінің жанындағы Бизнес мектебін бітірген. 1996-1998 жылдары Қазақ мемлекеттік басқару академиясының оқытушы-тәлімгері, оқытушысы, 1998-2006 жылдары Қазақстан Республикасы Ұлттық банкінің жетекші сараптамашысы, бас сараптамашысы, басқарма бастығы, Зерттеу және статистика департаменті директорының орынбасары, 2006-2014 жылдары Қазақстан Республикасы Ұлттық банкінің үйлестіру департаментінің директоры, 2014-2015 жылдары — «Қазақстанның тұрғын үй құрылыс банкі» АҚ басқарушы директоры, 2015 жылғы шілде мен қараша аралығында — Қазақстан Республикасы Президентінің Әкімшілігі Әлеуметтік-экономикалық мониторинг бөлімі меңгерушісінің орынбасары қызметтерінде болып, 2015 жылғы қарашада Қазақстан Республикасы Президентінің Әкімшілігі Әлеуметтік-экономикалық мониторинг бөлімінің меңгерушісі болып тағайындалған еді.
— Бүгін Президент әкімшілігінің жетекшісі Әсет Исекешевтің төрағалығымен Рухани жаңғыру бағдарламасын іске асыру жөніндегі селекторлық жиын өтті. Онда Түркістан облысының әкімі Жансейіт Түймебаев Елбасының мақаласында айтылған міндеттерді орындауға байланысты өңірде атқарылған жұмыстарды баяндап, алдағы уақытта іске асырылатын жобалармен таныстырды. Сондай-ақ, облыс әкімі 2019 жылы Түркістан облысында «Сәйгүліктер» фестивалі ұйымдастырылатынын айтты. Ұлттық кодты жаңғырту мақсатында өткізілетін шара аясында ұлттық ат спорт ойындары: теңге алу, аударыспақ, қыз қуу, жамбы ату, сәйгүліктер шеруі, сонымен қатар, ат әбзелдері, аттылы жауынгерлердің киімі мен қару-жарақтарына арналған көрмелер, жылқы малына байланысты жыр мүшәйрасы, жыршылар мен термешілер байқауы өтеді деп жоспарлануда. Одан бөлек, Қ.А.Ясауидің тарихи болмысын жаһанға өз деңгейінде толық танытып, насихаттау мақсатында бірқатар шаруалар атқарылмақ. Атап айтқанда, Елбасы тапсырмасы бойынша, жаңа Түркістанда Ясауи музейі салынбақ. Бұл мұражайда ғұлама мен оның шет мемлекеттердегі шәкірттерінің еңбектері қойылады. Яғни, Ясауи феноменін жоғарылатып, атын асқақтату арқылы ғылымды ғана емес, туризмді де дамыту мүмкіндігі ашыла түседі. Сондай-ақ, Түркістан қаласында әлемнің түкпір-түкпірінде Ясауи бабаның ғылыми мұрасын зерттеп жүрген ясауитанушылардың басын қосып, халықаралық конференция өткізу межеленген. Ясауи мұралары кешенді түрде зерттеліп, деректі және көркем фильмдер түсіріледі. Атқарылған жұмыстар мен жоспарға қаныққан Әсет Өрентайұлы шаруаны ширата түсіп, кестеге сай жұмыс істеуді тапсырды.
— 2018 жылғы 30 қараша күні Шымкент қаласында экстремизмге қарсы күрес және заңсыз көші-қон саласындағы шекаралық ынтымақтастық сұрақтары бойынша Өзбекстан Республикасының ІІМ және Түркістан облысы ПД полиция қызметкерлерінің екіжақты кездесуі болып өтті. Кездесуге Қазақстан жағынан ҚР ІІМ Штаб бастығы полиция полковнигі Қайрат Сүйінбаев, Түркістан облысы ПД бастығы полиция полковнигі Қ. Дәлбеков бастаған департамент басшылығы және Сарыағаш, Келес, Мақтарал, Шардара және Жетісай аудандық полиция бөлімдерінің бастықтары қатысты. Өзбекстан ІІМ-нен Ұйымдастыру департаментінің бастығы Норгитов Шухрат және шекаралық Жизақ, Ташкент және Сырдария облыстарының бастықтары: генерал-майор Кадиров Гайрат, полковник Арипов Тохтар, полковник Жураев Мухитдин бастап келді. Кездесу барысында қатысушылар екі елдің ішкі істер органдарының қылмысқа қарсы күрес саласындағы өзара байланысты алдағы уақытта жандандыру бойынша және шекаралық ынтымақтастықтың өзекті сұрақтарын талқылады. Қорытындылай келе, Қазақстан мен Өзбекстан ІІМ өкілдері қылмыспен күрес және шекаралық ынтымақтастық саласы бойынша бірлесіп ұйымдастыратын және іс жүзінде жүзеге асыратын бірқатар құжаттарға қол қойды.
— «AFROFEST-2018» облыстық ауыл шаруашылығы фестивалінде Қазығұрт ауданы 2-орынды иеленген болатын. Аталмыш аудан әкімі Төлеген Телғараев 2018 жылдың 10 айда атқарған жұмыстары жөнінде есеп берді. Алдағы уақытта да Елбасы саясатын жүзеге асыруда аудан әкімдігі барлық мүмкіндіктерді толық пайдаланбақ.
— Мылқау бейнені түсінікті тілмен сөйлетіп, тарихты туынды арқылы көрсете білу тек суретіші мен мүсіншінің қолынан келетін өнер. Осындай дарынмен дараланған таланттардың ішінде Сұлтан Иляевтің орны бөлек. Қазақстанның еңбек сіңірген қайраткері, Суретшілер одағы мен Дизайнерлер одағының мүшесікүні кеше Аламаты қаласында шығармашылығын тағы бір таныстырып, көрерменді жиды.
— Психология – жан туралы ілім. Елбасы 5 қазандағы халыққа арнаған жолдауында мектеп психологтарының жұмысын күшейтуді тапсырған болатын. Осы мақсатта, рухани астанада тұңғыш рет республика көлемінде жас психологтар форумы өтті. Шара соңында Түркістан облыстық отбасы, балалар және жастар істері жөніндегі басқармасы үш жақты меморандумға қол қойды.
— «Мен елімнің ертеңімін». Осындай тақырыппен Шымкент қаласындағы № 52-і мектеп — лицейі ашық есік күнін өткізді. Дәстүрлі түрде өтетін жиынға қатысқан ата-аналар алдымен мектеп ішінде арнайы экскурсия жасап, оқушылардың қолымен жасаған көрмені тамашалады. Онда қолөнер бұйымдары, робот техникалар, суреттер мен мүсіндер қойылыпты. Сондай-ақ, келген қонақтар/мектеп ұжымы мен оқушылардың бір жыл ішінде жеткен жетістіктері, атқарылған жұмыстар ретімен танысты. Арнайы экскурсиядан кейін, ата-аналар оқушылардың орындауында концерттік қойылымды қызықтады. Өнерлі балалар келген қонақтарға әнмен шашу шашып, мың бұрала биледі.
— 2016 жылы мектеп-лицей деңгейіне көтерілген білім ордасында 2300-ге жуық шәкірт білім алады. Сол уақыттан бері, оқушыларға химия-биология, физика-математика бағыттары бойынша білім беру дұрыс жолға қойылыпты. Сондай-ақ, мұғалімдер мектеп базасындағы пәндерді үш тілде оқыту жүйесін қолға алған. Қазіргі таңда номері 52 мектеп-лицейінде, оқушының жан-жақты дамуына сеп болатын бірнеше бағыттағы үйірмелер жұмыс істейді..
«Айғақ-ақпарат».
