— Нұрсұлтан Назарбаев режиссер А.Сатаевтың «Елбасы жолы. Астана» фильмін көруге барды. Бұл картина – «Елбасы жолы» киноэпопеясының бір бөлігі. «Елбасы жолы. Астана» фильмінде Қазақстан елордасының қалыптасу тарихы және оны салу үдерісіндегі Нұрсұлтан Назарбаевтың басты рөл атқарғаны жөнінде баяндалады. Кинокартинада 1994 жылғы шілде айында ел астанасын Алматыдан Ақмолаға көшіру туралы қабылданған маңызды шешімге байланысты оқиғалар көрсетіледі.
— Түркістан қаласында 2020 жылға дейін жаңа ғимараттардың саны көбеймек. Бұл туралы Түркістан облысының әкімі Жансейіт Түймебаев Тұңғыш Президент күніне орай өткізілген іс-шарада мәлімдеді. Елбасының «Ұлы даланың Жеті қыры» атты мақаласына баса назар аударған өңір басшысы, Түркістанның өркендеуі жолында құрылған жоспарларымен бөлісті. Кең көлемде аталып өтілген мерекенің соңы, концерттік бағдарламамен жалғасын тапты.
— Тұңғыш Президент күні қарсаңында Кентау қаласының 120 тұрғыны баспаналы болды. Күні кеше Түркістан облысының әкімі Жансейіт Түймебаев 5 қабатты 60 пәтерлі 2 тұрғын үйдің тұсауын кесіп баспана кезегінде тұрған жандарға пәтер кілітін тапсырды. Сонымен қатар облыс басшысы кенді қаладағы кәсіп орындардың жұмыс барысымен де танысты.
— Еліміздің тұңғыш Президентіне арналған мереке жер жерде тойлануда. Солардың бірі Арыс қаласының төрі. Айтулы күні қала тұрғындары Мемлекет басшысының өмір жолы мен еңбектерінен сыр шертіп, кітаптарынан көрме қойған. Халық қадірлейтін мерекеге айналған бұл күнді арыстықтар жоғарғы деңгейде атап өтті.
— Қожа Ахмет Ясауи атындағы халықаралық қазақ-түрік университеті мамандарының бастауымен Түркістан облысы мен Шымкент қаласының емханалары мен ауруханаларының балалар дәрігерлері бас қосты. Бас қосуға Түркия, Ресей елдерінен және Астана қаласынан медицина мамандары қатысты. Халықаралық конференцияда «Жұқпалы ауруларды емдеудің жолдары» тақырыбы қозғалды. Әсіресе, балалар арасында өршіп бара жатқан дертпен күресу дәрігерлердің басты мақсаты.
— Отырар ауданының білім саласы үшін 2018 жыл жетістіктерге толы болды. Яғни мектеп бітіруші түлектерідің биылғы ҰБТ қорытындысы бойынша орташа көрсеткіші 90,4 балды құраса, бұл нәтижемен Отырар ауданы облыс көлемінде көш басынан көрінді. Бұдан өзге батырлар жырын жатқа айтудан ұйымдастырылған жас жыршылар байқауының облыстық кезеңінде де аудан мерейі үстем болды. Себебі бұл сынға Көксарай ауылындағы М. Әуезов атындағы ЖОМ-нің атынан қатысқан 11 сынып оқушысы Бакира Олжас сайыстың бас жүлдесіне тігілген жеңіл автокөлікті жеңіп алса, осы мектептен сынға түскен тағы бір оқушы Бакира Қазына 2 орынға ие болған.
«Айғақ-ақпарат».
