— Оңтүстік Қазақстан медициналық академиясы тағы да жаңа қондырғымен толықты. Академия — өңірдегі болашақ дәрігерлерді сапалы біліммен қамтып отырған жоғары оқу орындарының бірі де бірегейі. Студенттер тәжірибе алмасу мақсатында хирургия саласын тереңінен меңгеріп келсе, енді Ресей елінен келген жаңа оқыту құрылғысын пайдаланып білімін шыңдайтын болады. Бұл құрылғының ерекшелігі ағылшын, орыс тілдерінде қызмет алуға мүмкіндік мол. Адам анатомиясын жіті зерттеп, жік-жікке бөліп ондағы капиляр тамырына дейін зерттеп танысуға болады. Әрбір қылшықтарды анықтап көрсетіп тұрған бұл құрылғы студенттерге өте тиімді-ақ. Түсінікті терминдермен жазылған құрылғы 3Д форматта қызмет көрсетеді. Нақтырақ, айтқанда смартфон секілді қызметтерді атқарады.
— Шымкент қалалық сот әкімшілігіне ең жас басшы тағайындалды. 27 жасында лауазымды қызметке келген Нұрсұлтан Байтілесовтің сот саласында 9 жылдық еңбек өтілі бар. Бүгін жаңа басшы сот әкімшілігінің ұжымына салтанатты түрде таныстырылды. Жиында сөз алған басшы елге адал, әрі әділ басшы болуға, артылған сенімді ақтауға жұмыс жасайтынын жеткізді.
— Шымкент қалалық білім басқармасы «Сыбайлас жемқорлықпен күрес» тақырыбында семинар өткізді. Шараға қала аумағындағы мектеп пен колледж директорлары қатысты. Оның негізгі мақсаты- білім саласында орын алып жатқан келеңсіз жағдайлардың алдын алу. Өйткені, қазіргі уақытта аталмыш салада заң бұзушылық факторы азаймай тұр. Мектеп директорының қарамағындағы қызметкерден пара алу фактісі 2016 жылы орын алған.Алайда, араға уақыт салып, екеу ара жасалған жымысқы істің беті ашылды. Бұл бас қосуда Сыбайлас жемқорлыққа қарсы ұлттық бюро мамандары аталмыш жағдайды негізге ала отырып, білім саласындағы қызметкерлерді сыбайластыққа жол бермеуге шақырды.
– Қазақстан мұсылмандары діни басқармасының Шымкент қаласы бойынша өкілдігіне қарасты 104 мешіт болса, ондағы имамдардың шамамен 30 пайызы ғана жалақы алып отыр. Яғни бұл дегеніміз дін қызметкерлерінің басым бөлігінің жалақысыз күнелтіп жүргендігін көрсетсе, олардың зейнетақы қорына не медициналық сақтандырына қаржы түспейді. Бұдан өзге Республикалық маңызға ие шаһарымызда коммуналдық шығындарын да өтей алмай отырған мешіттер бар. Сондай-ақ қаламыздағы 100-ден астам мешіттің тек 18-і ғана құжаттандырылған. Бұл туралы діни басқарманың Шымкент қаласы бойынша өкіл имамы Бақтыбай Бейсенбаев арнайы баспасөз жиынында мәлім етті.
— Шымкент қаласында биыл бірқатар негізгі автомобиль жолдары күрделі жөндеуден өтіп, жаңартылып жатыр. Мәселен Шымкент қаласын Сайрам тұрғын алабымен байланыстырып, Қарамұрт елді мекені аумағына дейінгі аралықты қамтитын күре жолдың күрделі құрылысы көктем айларында басталған. жалпы ұзындығы 8 шақырымды құрайтын облыстық маңыздағы бұл жолдың пайдалануға берілу мерзімі келер жылға өтпелі. Осы орайда елді мекен іштері арқылы өтетін жолды қайта құрылымдаудан өткізіп жатқан мекеме «Шымкент Дорстрой» ЖШС-гі жергілікті жердегі тұрғындарды құрылыс барысы аяқталғанша жобаға түсіністікпен қарауларын сұрайды.
«Біз салауатты өмір салты үшін». Осы ұран мен Шымкент қалалық денсаулық сақтау басқармасы және салауатты өмір салтын қалыптастыру орталығының мамандары акция ұйымдастырды. «Shymkent plaza» сауда орталығында өткен шараның негізгі мақсаты тұрғындарды салауатты өмір салтын ұстануға шақыру.
— Жуырда ғана мегаполис атанған Шымкент қаласының туризмі қарыштап келеді. Халықтың игілігі үшін түрлі мәдени орындар мен демалыс аймақтары күн санап артуда. Соның бірі елімізге белгілі меценат, қоғам қайраткері Төкен Жұмағұловтың «Гаваий Шымкент» демалыс орнының ашылуы. Төлеби ауданына бағыт алған жолдың жиегінде, Бадам өзенінің жағалауында орналасқан демалыс аймағыныңжалпы аумағы 5 гектардан асады.
– Түркістан облысына қарасты аудан қалаларда баспана кезегінде тұрған азаматтар үшін көпқабатты тұрғын үйлер салу жұмыстары қарқын алып келеді. Айталық тоғыз жолдың торабында орналасқан Арыс қаласының «Көктем 2» тұрғын алабында дәл қазір 36 пәтерлік үш бірдей тұрғын үйдің құрылысы жүріп жатыр. Айталық әлеуметтік нысандар салуда тәжірибиесі мол «Жедел құрылыс» ЖШС-гі осындағы №6 үй құрылысын өткен жылдың мамыр айынан бастаса, бүгінгі таңда үш қабатты ғимараттың негізгі жұмыстары аяқталуға жақын. Яғни құрылыс кестесіне сәйкес сапалы салынып жатқан тұрғын үй келер жылы толықтай пайдалануға берілетін болады.
