— Шымкент қалалық мәслихатының жаңа хатшысы сайланды. Шымкент қаласы мәслихатының кезектен тыс қырқыншы сессиясында ұсынылған кандидатқа халық қалаулылары бірауыздан қолдау білдірді. Сондай-ақ, мәжілісте Мегаполистің «Қала күні» 19 маусым күні ресми түрде тойланатыны бекітілді.
— Шымкент қаласында бос тұрған мектеп директоры лауазымына ашық конкурс өтті. Үміткерлермен әңгімелесу және конкурстық комиссияның жұмысына білім басқармасының басшысы Ақерке Абылайхан және комиссия мүшелері қатысты.
— Қазпоштаның қызметтері енді электронды түрде де көрсетіледі. Яғни, өз-өзіне қызмет көрсету бұрыштары мен роботтардың көмегімен барлық қажетті қызметтерді ала аласыз. Елбасының цифрландыру саясатын жүзеге асырған Қазпошта мекемесінде тек бағыттаушы екі қызметкер ғана жұмыс жасайды . Ал, басқа қызметтердің барлығын Арман және Сәуле атты роботтар атқармақ. Электронды қызметті қолданушылардың алғашқысы Шымкент қаласының әкімі Ғабидолла Әбдірахымов болды. Қала әкімі интернет арқылы сауда жасауға арналған карточканы, тапсырыс бергеннен кейін небәрі 10 минутта қолына алды. Осы секілді Қазақсатан қалалары арасында жедел хаттар жолдау, коммуналды төлемдер де электронды түрде болмақ. «Север» сауда үйінен ашылған мекеме Қазақстан бойынша 7-ші цифрлы кеңсе саналады. Бұған дейін Астана, Алматы және Ақтөбе қалаларында ашылған. Ал, алдағы уақытта Елбасының тапсырмасы бойынша Түркістан қаласында ашылатын болады.
— «Мемлекеттік биліктің, жергілікті өзін-өзі басқару органдарының, лауазымды адамдардың шешімдері мен әрекеттеріне дау айту». Дәл осы тақырып аясында Шымкент қалалық Абай аудандық сотында дөңгелек үстел өтті. Жиын барысында азаматтар мен заңды тұлғалардың құқықтары мен бостандықтары, заңмен қорғалған мүдделерін жүзеге асыруына кедергілер жасалу жайы талқыланды. Сондай-ақ, ҚР «атқарушылық іс жүргізу және сот орындаушыларының мәртебесі туралы» Заңына кірген өзгерістерге байланысты атқарушы құжаттардың атқарылуы туралы түсіндірулер жүргізілді.
— Биыл 3-рет «Ханбибі оқулары» дәстүрлі түрде өз жалғасын тапты. Елбасының «Болашаққа бағдар: рухани жаңғыру» бағдарламалық мақаласы аясында Сарыағаш қаласынан түлеп ұшқан Ханбибі Есенқарақызының шығармашылығы туған жерінде кеңінен насихатталды. Жыр сүйерқауымның басын қосқан додада қаламы қарымды ақынның ізін өкшелеп келе жатқан жас буын бәйгенің бас жүлдесіне таласты.
— Осыдан 18 жыл бұрын Елбасы сыйға тартқан бұхар бұғыларының саны 155-ке жетті. Өткен ғасырларда Сыр бойын мекен еткен жабайы тұяқтылар өкінішке орай 1960 жылдары тұқымы құртылған. Бұл табиғат байлығын сақтап қалу мақсатында 2001 жылы «Сырдария-Түркістан» мемлекеттік өңірлік табиғи паркіне қарасты «Бұхар бұғылары» тұқым бағы ашылды. Бүгінде бұғылардың санын арттыру жұмыстары жүйелі түрде жүргізілуде.
— «Ұлы орыс циркі» Шымкент қаласының төрінде. Ресей Федерациясының Халық әртісі Мстислав Запашный қала тұрғындарына цирк өнеріндегі үздік бағдарламаларын ұсынатын болады. Мегаполиске алғаш келген белгілі аң үйретушіні 50-ге жуық әртістерімен, 40-қа жуық жануарларымен «Оңтүстік-цирк» мекемесі құшақ жая қарсы алды.
— Ескерту – түзетуден оңай. Дәл осы атаудағы ұлттық бағдарлама аясында атынан ат үркитін дерт туралы дөңгелек үстел өтті. Онда қатерлі ісік ауруларын ерте сатысында анықтаудың мақсаты айтылып, мамандар адамдарды ауырмайтын жолға шақырып отыр.
