1995 жылы 30 тамыз күні Қазақстан халқы ұлттық референдумда ел Конституциясына дауыс берді.
ҚР-ның Ата заңы 1998, 2007, 2011 және 2017 жылдары өзгертілді.
2017 жылдың наурыз айында ҚР Президенті Нұрсұлтан Назарбаевтың Жарлығымен ел Конституциясына енгізілген соңғы өзгерістерге қол қойылды.
Бұл жоба ҚР Ата заңының 19-бабына үкімет тармақтары арасында билікті қайта бөлу, әсіресе президенттің кейбір өкілеттіктеріне қатысты енгізген 29 өзгертуден тұрады.
Қазіргі Конституция – бұл ел тарихындағы екінші заң.
ҚР-ның бірінші Конституциясы 1993 жылы 28 қаңтарда бекітілген болатын.
Облыс орталығы болып құрылған Түркістан қаласында бүгін өңір жұрты мерекені атап өтуде.
Мерекелік жиын барысында сөз алған Түркістан облысының әкімі Жансейіт Түймебаев: «Ата Заң күні — халқымыз үшін ең қастерлі, ең ұлық мереке. Мемлекетіміздің құқықтық негізін айқындаған Конституциямыздың қабылданғанына 23 жыл толды. Конституция — мызғымас мемлекетіміздің алтын қазығы. Бірлігі мен ынтымағы жарасқан елдігіміздің бұлжымас бағдары, кемел келешегіміздің кепілі! Бүгінгі жиынымыздың мәні тереңде екендігін атап айтуға тиіспіз. Өйткені Елбасымыздың бастамасымен өңірімізде тарихи тың бетбұрыс жасалып, мемлекеттің тағдырында маңызды орталыққа айналған Түркістанда өтіп отыр. Екі ғасырдан астам уақыт Ұлы дала дәстүрін дәріптеп, «Жеті жарғысы» жазылған қасиетті Түркістанның орны Қазақ елі үшін ерекше. Ендеше, тамыры «Жеті жарғыдан» тартылған Ата Заңымыздың айбыны асқақтай берсін! — деп өз құттықтауын жеткізді. Іс-шара барысында еңбегімен үздік атанған бір топ азаматқа марапат тапсырды.
Мерекелік іс-шараға облыс әкімінің орынбасарлары, мәслихат депутаттары, облыстық басқарма басшылары, құқық қорғау органдарының басшылары, ардагерлер алқасы мен зиялы қауым өкілдері, ҮЕҰ мүшелері, студент жастар, БАҚ өкілдерінен құралған 600-ге жуық азамат қатысты.
Тоғжан Нарбай
