Естеріңізде болса, 2016 жылдың күзінде Ресей Федерациясы, Курск облысы, Поныри ауданынан белгісіз солдаттың сүйегі табылған болатын. Ресейдегі іздестіру тобы бұл туралы мәліметті «Айғақ» қоғамдық телеарнасына жолдайды. Журналисттік зерттеу жұмыстарының нәтижесінде, белгісіз жауынгер ОҚО, Сайрам ауданына қарасты Шапырашты ауылының тумасы Пірәлі Ахмамбеков екендігі анықталды. Елінің ары үшін жанын садаға еткен ержүрек араға 76 жыл салып Отанына жеткізілмек. Соғыста хабар-ошарсыз кеткен майдангер Пірәлі Ахмамбековты анасы ғұмырының соңына дейін жалғыз перзентін зарыға күткен. Майдангер ұлым туған жердің топырағына оралса екен деген ана арманы бұйырса жүзеге аспақ. Яғни, мамыр айынының 1 — күні «Айғақ» қоғамдық телеарнасының басшысы Дулат Әбіш бастаған шығармашылық топ және жауынгер Ахмамбековтың жақын туысы Ресей еліне жол тартпақ.
Курск облысы, Поныри ауданында 3-мамыр күні Ахмамбековтің сүйегі Қазақстандықтарға ресми табысталатын болады. Жауынгердің сүйегін SCAT әуе компаниясы арқылы (груз 200 ) елге жеткізу жоспарланып отыр. Қазақстанға сүйегі жеткізілетін майдангер бауырымызды туған өлкесі Сайрам ауданына әскери құрметпен жерленеді деп күтілуде.
Бағлан Байкөбекқызы
