Оңтүстік Қазақстан облысының әкімі Бейбіт Атамқұлов Рио-де-Жанейродағы XХXI жазғы Олимпиада ойындарында жеңіске жетіп, ел мерейін асқақтатқан спортшыларды жүлделі медальдарымен құттықтайды.
Өңір басшысы жерлестеріміз — Рио Олимпиадасының қола жүлдегері Отгонцэцэг Галбадрахқа жылы лебізін тілек хаты арқылы жолдады.
«Құрметті Галбадрах Отгонцэцэг! Қазақстандықтар сіздің өнеріңізді зор қызығушылықпен тамашалады.
Жоғары спорттық шеберлігіңізбен асқан ерік-жігеріңіз сізге қиын күресте әлемдік деңгейдегі мықты қарсыластарды жеңіп шығып, Қазақстанның олимпиадалық командасы қоржынына қола медальді алып беруге көмектесті.
Сіздің Олимпиада ойындарында қола медаль алуыңыз елдің жас спортшылары үшін лайықты үлгі болары анық.
Алдағы уақытта Олимпиада ойындары мен әлемдік деңгейдегі жарыстарда еліміздің атын шығарып, көк туымызды желбірете беруіңізге шын жүректен тілектеспін!», — делінген жылы лебізді құттықтауда. 
Сонымен бірге, облыс әкімі Олимпиаданың күміс жүлдегері Жазира Жаппарқұлға да ыстық сәлемін жолдады.
«Құрметті Жазира Жаппарқұл! Сіздің Рио төрінде өтіп жатқан жазғы Олимпиада ойындарында күміс медаль алуыңызбен шын жүректен құттықтаймын!
Сіздің айқын жеңісіңіз Қазақстанның даңқын әлемге паш етті және отандық ауыр атлетиканың жоғары деңгейде екенін тағы көрсетті.
Даңқты қарсыластармен сайыста жеңіп алған күміс медаль сіздің жоғары шеберлігіңіздің, қазақ қызына тән қайсарлығыңыздың көрсеткіші.
Алдағы уақытта Олимпиада ойындары мен әлемдік деңгейдегі жарыстарда еліміздің атын шығарып, көк туымызды желбірете беруіңізге шын жүректен тілектеспін!, — делінген тілек хатта.
