6 наурыз күні өткен жалпы қалалық сенбілікке облыс және қала әкімі аппаратының басшылары, мәслихат депутаттары, басқарма мен бөлім басшылары, қала тұрғындары белсене қатысты. Облыс әкімі Бейбіт Атамқұлов, Шымкент қаласының әкімі Ғабидолла Әбдірахымов та көшет отырғызып, қала тұрғындарын тазалыққа шақырды. Қаланың әрбір тұрғыны тазалыққа көңіл бөлуі тиіс. Бәрі де тазалықтан басталады. «Бір тал кессең, он тал ек» деген бабалар сөзін естен шығармауымыз керек.
Облыс және қала әкімінің басшылығымен, облыстық, қалалық мәслихат депутаттары және қалалық әкімі аппараты қызметкерлері «Орталық» саябақта 100 дана түрлі-түсті қылқан жапырақты және жай жапырақты 500 дана аққайың көшетін, 500 дана раушан гүлін және 30 түп Қырым қарағайын отырғызды.
Алғашқы тазалық шарасының бір ерекшілігі – аналар мерекесі қарсаңында қаланы абаттандыруға тек ер-азаматтар үлес қосты.
Сондай-ақ, «Тарихи-мәдени этно саябағы» аумағында 2630 дана қылқан жапырақты ағаш, «Тәуелсіздік» саябағына 250 дана аққайың, 100 дана қылқан жапырақты ағаш, «Жеңіс» саябағына 250 дана аққайың отырғызылды. Бұл жұмыстарға арнайы 26 дана техника жұмылдырылды.
