Еліміздегі әрбір төртінші жоба ОҚО-да жүзеге асуда

Бұл туралы ОҚО Аймақтық коммуникациялар қызметінде өткен баспасөз жиынында облыстық кәсіпкерлік, индустриялды-инновациялық даму және туризм басқармасының басшысы Марат Қарабаев мәлім етті. «Елбасы Жолдауында жаңа инвестициялық саясаттың негізінде ел экономикасына инвестиция тартып, жыл сайын оның көлемін ұлғайтуды тапсырған болатын. Осы бағытта басқарма тарапынан көптеген жұмыстар атқарылып, бүгінде өз жемісін беруде. Мәселен, өткен жылы өңір кәсіпкерлерімен бірлесе Еуропа мен Азия мемлекеттеріне жұмыс сапарымен барып, ондағы индустриялды аймақтармен таныстық және бірқатар кәсіпорындардың жұмысын аралап көріп, шетел инвесторларын біздің облыста бірлесе жұмыс жасауға шақырдық»,- деді басқарма басшысы. Бүгінгі таңда өңірімізде шетелдік инвесторлардың қатысуымен 40-тан астам инсвестжоба жүзеге асуда. Атап айтсақ, облыста Ресей, Польша, Түркия, Италия, БАӘ, ҚХР, Корея Республикасы, Германия және алыс-жақын шет елден келген бизнесмендер өз жобаларын іске асырып келеді. Брифингте басқарма тарапынан атқарылған қорытынды жұмыстарын баяндаған Марат Қарабаев ндустрияландыру картасы аясында инвестиция көлемі 228,5 млрд. теңгені құрайтын 164 жоба іске қосылып, нәтижесінде 13,8 мың жұмыс орны ашылды. Оның ішінде 2015 жылы 27 жобасы іске қосылғанын хабарлады. Бұл дегеніміз еліміздегі әрбір төртінші жоба ОҚО-да іске асырылуда. Ал осы жобалардан 75,5 млрд. теңгенің өнімі өндірілген. Бұл өңдеу өнеркәсібі өнімі көлемінің 18 пайызын құрайды. Сонымен қатар, облыста «БЖК 2020» бағдарламасының іске асырылуынан бастап жалпы құны 482,1 млрд. теңгені құрайтын 997 жоба мақұлданып, 16 мыңнан астам жұмыс орны ашылды. Оның ішінде 2015 жылы жалпы құны 202,6 млрд.теңгеге 275 жоба мақұлданған. Сондай-ақ, бүгінде облыста ауылды жерлерден шыққан кәсіпкерлерді қолдау мақсатында арнайы бағдарлама әзірленуде. Аталған бағдарлама аясында кәсіпкерлерге бар болғаны 0,5 пайызбен субсидия беру жоспарлануда.