Кәріз коллектердің жарылуына байланысты тұрғындар қауіпсіз жерге көшірілуде

Шымкент қаласы Еңбекші ауданындағы «Оңтүстік» шағын ауданы (Чапаевка) Лермонтов №1 «Б» және Ташкент №2 «А» көшелеріндегі үйлердің арасында Деповская көшесі №21 үйдің ауласында 2016 жылы 3-4 қаңтар күндері аралығында диаметрі 1000 мм кәріз коллекторы жарылған. Нәтижесінде жер опырылып, жер бетінде диаметрі 2х2 метр мұржалар пайда болды. Соның салдарынан кәріз коллектордың үстіндегі жер толық опырылып, экологиялық сипаттағы төтенше жағдайға алып келу қаупі туындады. 1964 жылы салынған кәріз коллекторы 3-4 метр тереңдіктен өтеді. Оның жалпы ұзындығы 5,6 шақырым. 2016 жылы 6 қаңтарда құзырлы органдар кәріз коллектордың техникалық жағдайын зерттеп шығып, коллектордың тозығы жеткендігін және тордың шіріп кеткендігін анықтаған. Кәріз коллектордың санитарлық қорғаныс аймағында 100-ден аса тұрғыны бар 23 үй бар. Оның үстінде 5 тұрғын үй салынған. Осы учаскеде салынған барлық 115 үй жекешелендіру арқылы заңдастырылған. Кәріз коллекторы басқа жерде жарылған жағдайда адамдардың өмірі мен денсаулығына қауіп төніп, тұрғын үйлердің қирауы мүмкін. 2016 жылғы 6 қаңтарда Шымкент қаласы әкімінің басшылығымен жедел түрде төтенше жағдайлардың алдын алу және жою комиссиясының отырысы өткізіліп, «Жергілікті маңыздағы төтенше жағдай» жарияланған. 2016 жылы 7 қаңтарда осы учаскеге қосымша комиссиялық зертеу жүргізілді. Бүгінгі таңда бұл жерде басқа опырылымдар жоқ. Қала әкімшілігі Лермонтава №1 «Б» және Ташкент №2 «А» көшелеріндегі 13 тұрғынды қауіпсіз жерге көшіруде.