Еліміздегі ең ірі аудандардың қатарына жататын Мақтарал мен Шардара арасындағы тікелей жол байланысын қайта орнату үлкен маңызға ие. Осылай деген жергілікті азаматтар бүгінде онда жүргізіліп жатқан құрылыс жұмыстарын қуаттайтынын жеткізді. Тек жол ғана емес, Шардара су қоймасына жиналатын тіршілік көзін сақтап қалатын бөгеттің де рөлін атқаратын нысанды, ҚР АШМ Су ресурстары комитетінің төрағасы Ислам Әбіш арнайы келіп аралады.
Көршілес Өзбекстан елімен шекаралас жатқан Шардара, Мақтарал аудандары еліміз үшін аса маңызды, шаруашылыққа белсенді және экономикасы нығайған аймақтардың қатарына жатады. Кеңес Одағы тұсында Өзбекстан жері арқылы тікелей қатынайтын екі ауданның арасындағы даңғыл жол бүгінде тарс жабық. Сондықтан шекарадағы ағайындар бір-бірімен айналма жол арқылы 150-160 шақырымды бағындырып қатынауға мәжбүр. Ал 2012 жылы осы аралықты екі есеге дейін қысқартатын жаңа құрылыстың жұмысы басталған болатын. Мемлекет, қала берді халық үшін аса қажетті нысан болғандықтан оның әрбір тиыны мақсатты жұмсалған дейді ҚР АШМ Су ресурстары комитетінің төрағасы Ислам Әбіш.
Ауданның көнекөз қариялары мен жергілікті билік игіліктің істің бастау алғанын зор қуаныш деп біледі. Себебі біріне қажеттісін екіншісі түгендеп, бір-біріне сүйеу болып отырған көршілес аудандар үшін тікелей байланыстың орнауы қазіргі таңдағы өзекті мәселе болып отыр. Мұндағы құрылыс үшін әрбір сағат маңызды. Күні ертең судың деңгейі көтерілген жағдайда жұмыс істеу мүмкін болмай қалады. Сол себепті тәулік бойы тынымсыз жүретін жұмысты құрылысшылар ауысыммен үздіксіз жалғастыруда. Тіпті «ҚазСуШар» мекемесі мемлекеттен бөлінетін ақшаны күтіп отырмай-ақ өз қаржысына жұмысты бастап та жіберген. Әрине барлығы да уақыт үнемділігі үшін. Жалпы жоба бойынша құрылыс 29 шақырымға созылмақ. Ал биыл оның сол жақ жағалаудағы 10 шақырымына бетон құйылып бөгет жасау жұмысын аяқтау көзделіп отыр. Жоба толығымен іске асып, жол салынған жағдайда Шардара мен Мақтаралдық ағайынның арасындағы алтын көпір қайта орнаса нұр үстіне нұр болмақ.
Әбдімүтәлі ЖҰМАШ
