2015-2017 жылдарға арналған облыстық бюджет нақтыланып, қазына қаржысы кезек күттірмейтін мәселелерге бұйырды. Қаржы дағдарысы тұсында өңір бюджетін қайта қараған депутаттар бұл күні сан салаға бөлінген қаржының әр тиынын түгендеді. Әлемді алқымнан алып, аяғынан шалған қаржылық қиындық кезінде бюджеттің әрбір теңгесі тек бірінші кезектегі мәселелерге қаралуы керек. Осыны ескерген халық қалаулылары бюджетті нақтылау барысында қызметкерлердің еңбекақы мәселесіне және мемлекеттік «Балапан» бағдарламасының іске асуына баса назар аударды. Сонымен қатар, өңірдегі құрылысы аяқталмаған нысандарды жалғастыруға Ұлттық қордан қаржы бөлінді. Әлеуметтік салалар да бюджетті нақтылау кезінде ұмыт қалған жоқ. Алпауыт елдердің де есігін қаққан дағдарыс кезінде өңір депутаттарын Облыс әкімі Бейбіт Атамқұлов «бір жағадан бас, бір жеңнен қол шығарып» жұмыс жасауға шақырды. Тың бағдарламаларды қолға алып, жаңа жобалардың үнемі бастамашысы болып жүретін «Айғақ» телеарнасының хабарлар топтамасы қашан да жұртшылық тарапынан жоғары қолдауға ие. Осы ретте, аймақ басшысы арнамыздың тұрақты көрермені екендігін де жасырмады. Сессия соңында өңір басшысы алдағы атқарылар жұмыстарының жоспарын халық қалаулыларымен бөлісіп, ой елегінен өткізді. Өзіндік пікірлерін тыңдады. Бұл — әкім мырзаның жұмыстағы іскерлігін танытса керек. Өйткені, жаңа бастамалардың жүйесінде көпшілікке ортақ пікірмен санасқан жанның қызметі әрдайым өрге басатыны белгілі.
Еңлік ЗАМАНХАН
![230CP00.AVI_snapshot_00.00_[2015.10.21_18.58.59]](http://aigak.kz/wp-content/uploads/2015/10/230CP00.AVI_snapshot_00.00_2015.10.21_18.58.59.jpg)
