Оңтүстік Қазақстан облысы бойынша 92 мекеме мемлекеттік сатып алулар кезінде тауарлар мен қызметтер бағасын қымбатқа бағалаған. ОҚО Мемлекеттік қызмет істері және сыбайлас жемқорлыққа қарсы іс-қимыл департаменті мекемелердегі сатып алуларға мониторинг жасау барысында осындай заң бұзушылықтарды анықтап отыр. Қазіргі таңда мемлекет бюджетінің қаржысын ысырап еткісі келген мекемелердегі сатып алу конкурстары тоқтатылып, жауапты тұлғаларға шара көрілуде.
Мемлекеттік сатып алу кезінде тауар бағасын нарықтағыдан қымбат көрсеткен мекеменің бірі Шымкент қалалық тұрғын үй-коммуналдық шаруашылық бөлімі. Аталған мекеме қысқы маусымда қала көшелерінде көктайғаққа қарсы себетін техникалық тұздың әр тоннасын 11 мың 800 теңгеге сатып алуды жариялаған. Алайда құзырлы орган тексере келе тауардың бағасы 6,5 мың теңге екендігі мәлім болды. Сондай-ақ, Шымкент қалалық жұмыспен қамту және әлуметтік бағдарламалар бөлімі де дәл осындай жағдайға жол берген. Мәселен, мүгедектер үшін берілетін міндетті гигиеналық құралдардың әр данасын 2571 теңгеден сатып алмақшы болған. Дегенмен тауардың нарықтағы құны 960 теңгені құраған.
