Сенбі күні қаламыздағы көп қабатты тұрғын үйдің бірі қайта жөндеуден өтіп қайта, пайдалануға берілді. «Жұмыспен қамту – 2020» бағдарламасының өңірлерді дамыту бағыты бойынша жүзеге асқан жобаға «Тұрғын үй Шымкент» ЖШС бастамашы болып отыр.
Бүгінгі таңда «Тұрғын үй Шымкент» ЖШС-нің тапсырысы бойынша қаламызда 39 көпқабатты тұрғын үй қайта жаңғырту бағдарламасы бойынша жөндеуден өтуде. Оның 19-ы бүгінде пайдалануға беріліп үлгерсе, қалған 15 –нің жұмысы аяқталуға шақ тұр. Соның бірі, 1958 жылы кірпіші қаланып, бүгінде тозығы жеткен Алдияров көшесі бойындағы №74 үй. Аталмыш нысанды қайта жаңғырту кезінде ғимараттың шатыры мен әрлеу, сырлау жұмыстары жүргізіліп, тұрғын үй жаңаша кейіпке енген. Осылайша қуанышқа кенелген пәтер иелері небәрі бір жарым айдың ішінде құрылыс жұмыстарының аяқталғанына дән риза. Қысқа мерзімде атқарылған жұмысқа облыстық бюджеттен бес жарым млн. теңге қаралыпты.
Жандос ШАДЫХОДЖАЕВ
