Төлеби ауданының әлеуеті артып, туризмі дамып келеді

Жұмыссыздықты жойып, халықтың әл ауқатын арттырып, тұрмысын түзеуді басты мақсат еткен Төлеби ауданында  алты айдың ішінде 49,8 мың адам тұрақты жұмыспен қамтылыпты. Сондай-ақ, мемлекеттік бағдарламалардың орындалуы және облыс әкімідігі тарапынан берілген тапсырмалар бойынша да аудан көш ілгері. Яғни тапсырма дер кезінде орындалып, әр салада өсім бар. Бұл туралы аудан әкімі Әуелхан Тұрғымбеков баяндады. Туризмі өрістеп,  «Оңтүстіктің  Швейцариясы» атанған өлкеде  9 млрд 698 млн теңгенің өнімі өндіріліпті. Ал, үдемелі индустриялды-инновациялық даму бағдарламасы аясында жұмыстар да жетерлік. Мәселен, ауданда  соңғы  5 жыл ішінде 13 жоба жоспарланса, оның 9 бүгінде іске қосылған.  Жобаның қуаттылығы да жоғары деңгейде. Жалпы жасыл аймақты ауданда  кәсіпкерлік саласы да қарқынды дамып отыр. Аталмыш салада еңбек етіп, кәсібін өрге домалатып отырғандардың саны 14697 адамға жеткен. Шағын және орта бизнес саласында өндірілген өнім және  көрсетілген  қызметтер  көлемі 19 млрд 865млн теңгені құрап отыр. Ауылды жерлердегі ағайынның күнделікті  тұрмыс қажеттілігіне көмек болып отырған ауыл шаруашылығы  саласы да өз алдына бір төбе. Яғни, жылыжай салу, тамшылатып суғару, терең қопсыту технологиясын ендіруде  тапсырма толықтай жүзеге асып келеді. Ал, мал басын көбейту үшін «Сыбаға» бағдарламасы бойынша  міндетті 500 бас болса 314- і алынып, артығымен орындалыпты. Білім, денсаулық салалары да қарышты дамуда. Ал, ауыз су мәселесі де бірте- бірте өз шешімін тауып келеді. Яғни ауданға қарасты 55 елді мекеннің бүгінде 51-і орталықтандырылған ауыз су құбырымен қамтамасыз етілген. Бұл ауылдардың 41-і 24 сағат ауызсу қолданып отыр. Көгілдір отын жайына тоқтала кетсек. 2015 жылы  Көксәйек, Қазақстан, Жіңішке елдімекендерін газбен қамтамасыз  ету құрылысы аяқталып іске қосылған жағдайда, ауданның 36 елді мекеніндегі 95 706 халық көгілдір отынның пайдасын көретін болады. Ал, қалған елді мекендер жайы кезеңімен іске аспақ. Жалпы ауданда ілгері даму бар, әр салада атқырылған жұмыстар бойынша көрсеткіш те жақсы.