8 тамыз күні Оңтүстік Қазақстан облысының әкімі болып тағайындалған Бейбіт Атамқұлов сәрсенбінің сәтінде, өңір әлеуетімен танысу үшін Шымкент қаласын аралапты. Яғни, әкімнің алғашқы жұмыс сапары шаһардың бүгінгі тыныс-тіршілігіне арналған. Алдымен, жөндеуден өтіп жатқан бірқатар мектептердегі жұмыс барысымен танысқан. Бұл туралы Оңтүстік Қазақстан облысы әкімдігінің баспасөз орталығы таратқан мәлімдемеден белгілі болды. Айтып өтейік, өңірде биыл республикалық және облыстық бюджет есебінен 104 білім нысанының құрылысы қолға алынған. Оның ішінде жыл аяғына дейін 67 білім мекемесінің құрылысын аяқтау жоспарланса, бүгінге дейін 37 нысан білім күніне сақадай сай тұр. Шәкірттердің игілігіне берілген жаңа нысандардың ішінде ғимараты апатты деп танылған 19 мектептің де құрылысы аяқталып отыр. Жыл соңына дейін осы санаттағы тағы 10 мектептің құрылысын бітіру жоспарда бар. Ал, қалған 27 апатты жағдайдағы мектептің мәселесі 2017 жылға дейін өз шешімін таппақ. Сонымен қатар, биыл 100 білім ошақтарында күрделі жөндеу жұмыстары жүргізілуде екен. Қазіргі таңда осы бағыттағы жұмыстардың 80 пайызын аяқталып үлгеріпті. Негізі білім мекемелерінің жөндеу жұмыстарын облыс аумағында 25 тамызға дейін аяқтау жоспарда бар.
Жаңа оқу жылы қарсаңында білім мекемелерінің дайындығын пысықтауды мақсат еткен облыс әкімі бастаған жұмыс тобы Шымкенттегі Б.Момышұлы атындағы №44 және Қазыбек би атындағы №36 орта мектептеріндегі жөндеу жұмыстарымен, Сайрам елді мекеніндегі 1200 орындық орта мектептің құрылысымен танысты.
Білім ошақтарының алдағы оқу жылына дайындығын пысықтаған облыс басшылығы мердігерлерден жоспарланған жұмыстарды өз мерзімінде аяқтауды талап етті. Сондай-ақ, құрылыс жұмыстары барысында қолданылып жатқан материалдардың сапалы болуы керектігін, мектеп аулаларының көріктендірілуін де басты назарда ұстау қажеттілігін ескертті. Әлеуметтік нысандардың құрылыс-монтаждау жұмыстарына қажетті жобалау-сметалық құжаттарды әзірлеуде ғимараттардың жылу жүйелерін жылыту маусымында іс-жүзінде қадағалау мәселесі мен мектеп іргесіндегі жер учаскелерін суғару жүйесін орнату талаптарын ескеруді жүктеді.
Жұмыс сапары қорытындысында білім ошақтарындағы атқарылып жатқан жұмыстарды оң бағалаған Бейбіт Атамқұлов мектептерде балалардың сапалы білім мен тәрбие алуы үшін барлық жағдай жасалуы керектігінде естен шығармай, көңіл бөлу керектігін жауаптыларға тапсырды. Облыс әкімдігі алдағы кезеңде саманнан салынған мектептердің орнына заманауи білім ошақтарының бой көтеруі жөнінде нақтылы шараларды атқармақ ниетте екен. Алдағы уақытта, облыс әкімі Бейбіт Атамқұлов өңірге жасаған жұмыс сапары барысында жергілікті БАҚ өкілдерін тыс қалдырмай, жиынға қатыстырады деген сенім мол.
