Жерлесіміз, Оңтүстіктің бірегей тұлғасы, Созақтың тумасы, ҚР Президенті Іс басқармасы Медициналық орталығы басшысының бұйрығымен Қайрат Шерәліұлы Беркінбаев «Оқжетпес» емдеу сауықтыру кешені» АҚ президенті болып тағайындалды. Қайрат Шерәліұлы 1965 жылы Созақ ауданында дүниеге келген. 2007 жылдан 2011 жылға дейін ОҚО мәслихатының депутаты болып сайланған. 2011 жылдан бастап, ҚР Президенті Іс басқармасы жүйесінде қызмет атқарып келеді. Яғни, ҚР Президенті Іс басқарушысының көмекшісі болса, 2012 жылдан бері ҚР Президенті Іс басқармасының «Қараөткел» РМК директор болып жұмыс атқарды. 2015 жылғы мамыр айынан ҚР Президенті Іс басқармасының «Бурабай даму» ЖШС директоры және Щучье-Бурабай курорттық аумағының дамуы бойынша бақылау кеңесінің төрағасы.
Туған жерінің әлеуметтік дамуында үлес қосып жүрген азамат жомарттық танытып үнемі халқына жәрдемдесіп тұрады. Тіпті, ауылында өз қаражатымен салдырған мектеп бүгінде үлгілі білім мекемелерінің бірі. Қайбір істе болмасын, бар күш жігерін жұмысының жандануына жұмсап, тірлікте өзіндік қолтаңба қалдыра білген «Парасат» ордені, «Меценат» медалі, ҚР Президентінің «Құрмет» Дипломының иегері, ҚР Президентінің «Парыз» сыйлығының лауреаты Қайрат Беркінбаевтың жаңа қызметінде сәттілік тілейміз. Туризм саласының өркендеуінде өзіндік үлесін қосады деген сенім мол.
