Қазақстан ресми түрде Дүниежүзілік сауда ұйымына мүше болды. Еліміз үшін аса маңызды бұл тарихи күн 19 жыл көлемінде жүргізілген келіссөздердің нәтижесінде орын алып отыр. Бұл туралы 27 шілдеде Мемлекет басшысы Нұрсұлтан Назарбаев пен Дүниежүзілік сауда ұйымының бас директоры Роберто Азеведо республиканың ұйымға мүше болуы жөніндегі Хаттамаға қол қойды. Ұйымға мүшелікке кіру мемлекетіміздің экономикасына жаңа белестерді бағындыруға мүмкіндік бермек. Сондай-ақ, бұл тарихи оқиға өндіріс орындарының ашылуына, халықтың табысын арттырып, тұрмыс деңгейін жақсартуға ықпал етуімен ерекшеленеді. Бүгінде Қазақстан сауда-саттық жүргізетін елдердің 90 пайызы осы ұйымның мүшелігіне кірген. Сондықтан, еліміз экспорттайтын тауарлардың сапасы да әлемдік нарыққа сай болуы маңызды. Қуанышты жаңалықты Оңтүстіктің кәсіп иелері де жылы қабылдады. Көптен күткен тарихи оқиға кәсіпкерлік саласына тың серпін береді деген мамандар, импортталатын тауарлардың құны арзандауы мүмкін дейді.
