Соңғы жылдары ел арасында көкпар ойындары көптеп ұйымдастырылып келеді. Мақсат ұлттық спорт пен оны жанына серік еткен тақымы мықты шабандоздарды халыққа насихаттау. Осы орайда, Түркістан облыстық балалар мен жасөспірімдерге арналған ұлттық спорт мектебі ұйымдастырған жастар арасындағы командалық көкпар ойындары осы бір спорт түрі бойынша Кеңес Одағының 7 дүркін жеңімпазы, даңқты палуан Шымырбай Әуезбаевтың жүлдесіне арналды. Төлеби ауданының Қасқасу ауылында 1949 жылы дүниеге келген Шымырбай ақсақал жастайынан көкпар ойынын жанына серік етіп, талай додаларда топ жарған даңқты спортшылардың бірі. Өзінің ізін басқан інілерді де ұлттық спортқа баулып, талай шәкірттерді шыңдаған азамат бүгінде 70 жастан асса да, әрдайым көкпар ойындарының белсенді жанкүйері болып келеді.
Сонымен, бұл күнгі көкпар додасына өңіріміздің 7 ауданынан 7 бірдей 21 жасқа дейінгі спортшылардан құралған командалар қатысса, жарыс шымылдығы Сайрам және Ордабасы ауданы құрамаларының кездесуімен басталды. Ал, бұл дүбірлі бәсекені ұйымдастырушылардың айтуынша, спорттық іс-шараның басты мақсаты – Шымырбай ақсақалдай даңқты спортшыларды дәріптеу, ұлттық спорт түрлерін бұқара арасында кеңінен насихаттау, ел арасында салауатты өмір салтын қалыптастыру, жастарды достыққа, париоттық сезімге, мәдениеттілікке тәрбиелеу болып табылады.
Жастар арасындағы командалық көкпардың шымылдығын түрген Сайрам мен Ордабасы командалары кездесуінің қорытындысы бойынша Ордабасылық команда қарсыластарын қапы қалдырып, 5-0 есебімен айқын жеңіске жетті
Қазақта ұлттық спорттың сан алуан түрі бар. Бірақ, арасында көкпардың шоқтығы ерекше биік. Тіпті, еліміздің әр аймағында ат спорты мектебі құрылып, көкпар командалары жасақталған. 1991-1992 жылдары командалық көкпардың алғашқы ережелері жазылып, ойынды белгілі бір тәртіппен, бекітілген жүйемен өткізу қалыптаса бастады. Сонымен, бұл күні сынға түскен 7 командадан жартылай финалға Қазығұрт, Төлеби, Ордабасы және Келес ауданының құрамалары іріктеліп шықты.
Бұл спортта ойыншыдан бөлек сынға түскен сәйгүлік те мықты болуы керек. Төрт түліктің төресін тізгіндеп қана қоймай, онымен жүйелі жұмыс істеу қажет. Қанымызға жат емес, делебені қоздыратын көкпар қазір үлкен қызығушылыққа ие. Көкпар — жігіттердің күш жігерін, төзімділігін батылдығы мен ептілігін, ат үстінде мығым отыруын қалыптастырады. Сонымен қатар, көкпар – аттың қалай бапталып, үйретілгенін, жүйріктігін де сынайтын спорт.
Шымырбай Әуезбаев атындағы облыстық турнир мен чемпионаттың ақтық бәсекелері де тартысқа толы болды. Айталық, үшінші орынға таласқан Келес пен Қазығұрт ауданының командалары арасындағы кездесуде 3-4 есебі тіркеліп, Қазығұрт ауданы жеңіске жетсе, чемпионат жеңімпазы анықталатын ақтық сында Төлеби мен Ордабасы ауданының құрамалары кездесті. Сонымен, жан алысып, жан беріскен кездесу қорытындысымен бабы мен бағы қатар шапқан Ордабасы командасы жеңіс тұғырынан көрінді. Нәтижесінде, бірінші орын Ордабасы ауданы, екінші орын Төлеби, ал үшінші орынға Қазығұрт ауданының көкпар командасы жайғасса, жеңімпаздар жарысты ұйымдастырушылар алқасының арнайы марапаттарына ие болды.