2019 жылдың 24 маусым күні Арыс қаласында орын алған төтенше жағдай тұтас қазақ елінің қабырғасын қайыстырды. Тектілік — қанымызда бар қасиет, осындай қиын-қыстау сәтте ел елдігін танытты. Сол сәтте алғашқылардың бірі болып көмек қолын созғандар бүгін кеш болса да Арыс қаласының әкімі Мұрат Қадырбектің қолынан алғыс хаттар алды.
«Арыс — біз біргеміз!» деген ұранды ту еткен қайырымды жандар өңір тұрғындарына барынша көмек көрсетті. Бірі ақпараттық, бірі материалдық, моральдық қол ұшын созды. Сондай-ақ, төтенше жағдайдан кейін Арыс қаласын қайта қалпына келтіру жұмысыстарына да ат салысып, тұрғындардың уақытылы баспаналарына оралуына септігін тигізді. Осы үшін Арыс қаласының әкімі Мұрат Қадырбек өзінің және тұрғындардың атынан алғысын білдіріп, тыныштық тіледі. Марапат алушылар қатарында «Айғақ» арнасының ұжымы, қоғам зиялылары, жеке кәсіпкерлер, ұстаздар және журналистер бар.