ҚАЙРАТ ЖОЛДЫБАЙ – ТҮРКІСТАН ОБЛЫСТЫҚ АУЫР АТЛЕТИКА ФЕДЕРАЦИЯСЫНЫҢ ПРЕЗИДЕНТІ БОЛЫП САЙЛАНДЫ

Шардара ауданының әкімі Қайрат Жолдыбай Түркістан облыстық ауыр атлетика федерациясының президенті болып сайланды,-деп хабарлайды Шардара ауданы әкімінің баспасөз қызметі.

Шардара қаласындағы Спорт кешенінде Түркістан облыстық дене шынықтыру және спорт басқармасының басшысы Полат Қырықбаев аудан әкімі Қайрат Жолдыбайға федерация президентінің куәлігін салтанатты тұрде тапсырды. Өз кезегінде сөз алған Қайрат Жолдыбайұлы алдағы уақытта өңірімізде спорттың ауыр атлетика саласын одан әрі дамыту үшін күш-жігерін аямайтынын жеткізді.
Ауыр атлетикадан жасөспірімдер арасында ұйымдастырылған Түркістан облыстық чемпионатында Шардара ауданының әкімі Қайрат Жолдыбайұлы облыстық ауыр атлетикадан жасөспірімдер құрамасының жаттықтырушысы Асхат Көбеевке, Полат Наурызбайұлы облыстық ауыр атлетикадан жасөспірімдер құрамасының аға жаттықтырушысы Талғат Өскенбаевқа ЗКС олимпиадалық штангасын сыйға тартты.
Салтанатты шараға қатысқан белгілі бапкер, ауыр атлетикадан олимпиаданың күміс жүлдегері Жазира Жаппарқұлдың алғашқы ұстазы болған Дүйсебек Құрманов сөз сөйлеп, зілтемірші жастарға ақ батасын берді.
Мұнан кейін, 2005 жылы туылған және одан кіші жасөспірім ұлдар мен қыздар арасындағы ауыр атлетикадан облыс чемпионаты басталып кетті.