Қазір мегаполистегі аудан әкімдері халық алдында есеп беріп жатыр. Бірақ, қала тұрғындарының көпшілігін жыл бойы атқарған шаруаның баяндамасы қызықтырмайтын сияқты. Жұртқа керегі әлеуметтік мәселенің нақты шешілгені және қоғамдық көліктің жүйеге түскені маңыздырақ. Еңбекші ауданының әкімі Ғалымжан Ильясов тұрғындар алдында есеп берем деп, қоғамдық көліктің мәселесімен әлек болып есі кетті.
Ғалымжан Ильясовтың Еңбекші ауданын басқарып келе жатқанына алты жарым жыл болыпты. Тәжірибе жинаған әкімге халық алдында есеп беру есепті пістеше шаққанмен тең. №127 мектептің акт залына кірген бойда есептік баяндамасын бастап кетті. Бұл әкім өзге басшылар сияқты қағаз бетіне қарап жарты сағат телміруді құп көрмеді. Он бес минуттың көлемінде бір жылдағы жұмысты шолып өтіп, тұрғындардың сұрақтарына жауап беруге тырысты. Жиылған жұртқа керегі де осы екен. Бірден, сөзбен-ақ түйреп өтті.
Жол, су, жарық, газ мәселесі бітпейтін дау, өнбейтін іс болып тұр. Бұл жағдайға тұрғындар түсініспеушілікпен қарады. Тек жиылған жұрт қоғамдық көлік туралы тақырып қозғалғанда шындықты шырқыратып, ТМД-ның мәдени астанасының сиқын айтты. Кейде «өзін өзі мақтаған — өгіз тентек» сияқты алдымызға жан салмай бөркімізді аспанға лақтырып жатамыз. Мәселен, биылғы жылы Шымкент ТМД-ның мәдени астанасы деп айқайлап жүрміз. Бірақ, қоғамдық көлігіміз көңілді көншітпейді. Автобус, маршуттардың жұмысы әлі жүйеге дұрыс қойылмаған. Тозығы жетседе жолаушы тасымалымен айналысатын ескі қоғамдық көліктер қала көшелерінде жүйіткіп жүр. Осы мәселеге ренішін білдірген тұрғындардың сансыз сұрағына әкімнің өзі ақтарылып жауап айтты.
Ғалымжан Ильясов: «Біз өскенде тәрбие болды. Менің өзім 1,5 шақырым жердегі мектепке барып оқып келетінмін. Аман-есен өстік, ештеңе болған жоқ. Мен бес жыл Қазығұрт ауданында ауыл әкімі болып жұмыс істедім. Сонда балаларым мектепке жаяу барып келді, сіздер басқан топырақпен олар да жүрді. Бірақ, үйден шығарда шешесі төбесін ойып жіберетін. Жолдан өткен де оңға қара, солға қара деп. Сіздерге мен мұнымен ақыл үйретейін деп жатқан жоқпын. Тек бюджеттің мүмкіндігі де біздің отбасымыздың мүмкіндігі сияқты. Бірінші кезек күттірмейтін әлеуметтік мәселе шешіледі. Әрине, кім қай жерде тұрып жатыр, сол жер ыстық ол кісіге. Бірақ мен аудан әкімі ретінде бір жерге үңіліп қарауға қақым жоқ. Мен жалпылама аудан бойынша барлығына бірдей қарауым керек.»
Еңбекші ауданының тағы бір мәселесі – қаңғыбас иттер өріп жүр. Ауданның тұрғындары көшеден еркін өтуді қойдық дейді. Жеті қазынаның бірі саналған қайран төбеттердің егесі жоқ немесе қарғы баумен қаңғып кеткен. Әзірге «ит қапты» деген суық хабарды ести қойғанымыз жоқ. Десек те, жаман айтпай, жақсы жоқ. Миллионды қаланың 300 мыңы Еңбекші ауданында тұрады. Аймақты табиғи отынмен толық қамтамасыз ету 2023 жылға жоспарланған. Одан бөлекте шаруа жеткілікті. Тек әкім Ильясов «бірлік бар жерде – тірлік бар» деп жиылған тұрғындарды ынтымаққа шақырды.
