Еліміздің индустриялық-инновациялық даму бағдарламасы аясында жүзеге асырылған жобалардың бірі — Шымкенттегі «Бесқұдық тас» зауыты. «Оңтүстік» индустриалды аймағында орналасқан кәсіпорын жылына 350 мың шаршы метрге дейін тас өңдеп, құрылысқа қажетті түрлі пішіндегі материалдар шығарады.
Аталған зауыттың тыныс-тіршілігімен бүгін қала әкімі Ерлан Айтаханов арнайы барып танысып, жұмысшылармен жүздесті, деп хабарлайды Шымкент қаласы әкімінің баспасөз қызметі. Зауытта дайындалған травертин құрылыс материалы бүгінде Шымкент қаласындағы көпқабатты тұрғын үйлердің сыртқы келбетіне қолданылып келеді.
Мәселен, қаладағы Тәуке хан даңғылы мен Байтұрсынов көшелерінің қиылысында орналасқан көп қабатты үйдің қасбетін аталмыш мекеме өз есебінен көркейтіп берді.
