Шымкентте 900 орынға арналған балабақша іске қосылды. Білім күніне орай ашылған бұл мектепке дейінгі мекеменің ерекшелегі инклюзивті білім бермек. Яғни, барлық баланы бөле-жармай қоршаған ортаға қарай бейімдеу, өмірге ғашық ету. Балабақша кезегінде тұрған бүлдіршіндер шаттанған күні мегаполистің әкімі Ерлан Айтаханов та арнайы барып, жеке кәсіпкердің еңбегіне алғыс айтты.
Кәсіпкер Низамхан Сүлейменов соңғы уақыттары бүлдіршіндер мен оқушыларды қуантып жүр. Мектеп пен балабақша ашудан алдына жан салмайтын азамат бұл жолы тағы сол білімді ұрпақты қуантуды жөн санапты. 900 орынға шақталған мекемені бір ғана жылдың ішінде іргетасын көтеріп, лентасын кесуге берді. Тассай шағын ауданына салынған бұл ғимараттың құрылысы биыл наурыз айында басталған болатын. Небәрі бес айдың ішінде сапасына сөз тигізбейтіндей етіп салдық деп отыр. Бүлдіршінді өзіне баурап әкететін түрлі-түсті суреттермен әспеттелген балабақшаға қаланың әкімі келіп, мемлекетке жәрдем беріп отырған азаматтың ісін жоғары бағалады.
Шымкент қаласында 501 балабақша бар. Соның 400-ден астамы жекеменшік. Кәсіпкер өз қаражатына салған мекемелердің құрылысы қайта жылдам аяқталып, өзінің ар-ұяты үшін сапалы етуге тырысады екен. 900 орынға шақталған мына балабақшаға қазірдің өзінде бүлдіршіндер тоқтаусыз тіркеліп жатыр. 32 топ жұмыс істейді. Таңнан кешке дейін жұмыстан қолы босамайтын ата-ана үшін таптырмас балабақша тәрбиені мейіріммен беруге ниет етіп отыр.
Бұрын ата-ана баланың бойына ұлттық салт-дәстүрді сіңіруді әжелеріне тапсыратын. Үлкеннің жанында жүріп, олардың өнегелі әңгімесін тыңдап өскеннің сана-сезімі өзгеден ерекше болып қалыптасады. Ол баланың бойынан мейірім мен кеңдік байқалып тұрады. Қазақ, орыс, ағылшын тілдерінде білім беретін балабақша да сол саясатты ұстанбақ. Ерлан Қуанышұлы жаңа ғимараттың әр бөлмесі мен материалдық құрылғыларына көңіл бөліп, толық танысып шықты. Жаңа мекеменің ішінде әзірге 200 бала бар. Сол бүлдіршіндер мен тәрбиешілер ашылу салтанатына концерттік бағдарламаларды әзірлеп, әкімге өздерінің мүмкіндігін көрсету үшін дайындалған. Айтаханов сол еңбектері еш кетпесін деген болар, бар балақайдың қызықты өнерлерін тамашалап, қол соқты. Жылы сөз айтып, бастарынан сипап кетті.
Баланың денсаулығын қадағалайтын медбике бөлмесі, психологиялық дамуын байқап отыратын психолог, логопед пен ұстаздар жұмыс жасап жатқан балабақша әр топты жас ерекшеліктеріне қарай дайындаған. Қосымша үйірмелер де бар. Толық бейнекамералармен жабдықталған. Айта кетейік, мегаполисте балабақшаға кезек күтіп тұрғандардың саны әлі 23 мыңнан асады. Сондықтан, дәл осындай мектепке дейінгі мекеме керек-ақ болып тұр. Кәсіпкер Низамхан Сүлейменов бұған дейін биылғы жылдың шілде айында мектеп ашып, пайдалануға берген болатын. Абай Құнанбаевтың 175 жылдық мерейтойына орай бой көтерген білім шаңырағына ұлы ақынның есімі берілді.
1200 оқушыға арналған жалпы орта мектебі жаңа оқу маусымын алғаш рет бастағалы тұр. Бірақ, бала саны 1800-ге жетіпті. Ата-ананың көпшілігі баласының жаңа ғимаратта, білікті ұстаздардан білім алғанын қалап отыр. Өйткені, бұл мектепке мұғалімдер тест арқылы жұмысқа тұрған. Ақынның есімін иеленген мекемеден қаланың әкімі аттап кетпеді. Уақыт бөліп, аялдады. Ішін аралап көріп, жағдай жасалғанына көзі жетті.
Білім ордасында оқушылар қолөнер және тігін тігумен айналысуға болады. Түрлі өнер үйірмелері мен спорттық шараларға қатысуға мүмкіндік жасалған. 400 орынға арналған акт зал, асхана, спорт залы талапқа сай. Бұл су жаңа ғимараттың орнында бұрын саманнан салынған №85 мектеп болатын. Ғасырлық тарихы бар сол білім ұясы қайта жаңарып отыр. Мектептің жүрегі – ұстаз. Сондықтан ұлағатты тұлғалар мейірімді, екінші ата-анадай қамқор болса болғаны. Қала әкімі осындай ой тастап, жұмысты енді бастап отырған ұжымға сәттілік тілеп кетті.