Биыл Түркістан облысында 53 мың бүлдіршін мектеп табалдырығын аттайды

Облыс орталығы Түркістан қаласында адами әлеуетті дамыту басқармасының ұйымдастыруымен өткен жиын аймақтың білім саласы қызметкерлерінің басын қосты. Конференцияда пленарлық мәжіліс және секциялық жұмыстар болды.

Кеңестің негізгі мақсаты — білім саласында болып жатқан жаңа өзгерістер мен өзекті мәселелерді, оның шешу жолдарын қарастырып, тәрбие мен білім сапасын көтеру сияқты басты міндетті талқылау. Еліміздегі мектеп оқушыларына сапалы білім алуға қажетті жағдай жасау, білім деңгейін көтеру, мамандар әлеуетін арттыру, білім мазмұнын жаңарту, Қазақстандық білім беру жүйесінің даму стратегиясын айқындау.
Еліміздің әлемдік үдерістерге кіруі, дамыған елдердің стандарттарын ендіру мен білім беру мазмұнын жаңа сапалық деңгейге көтеру қарқыны артып келеді. Осыған орай, білім беру жүйесінде жасалып жатқан жаңалықтар барлық деңгейлердегі білім мазмұнын жаңартуға және өсуден тұрақты даму кезеңіне өтуге бағытталуда. Сондай-ақ, бұл кеңесте жастарға бағытталған жобалар басты назарға алынды. Жастар бойындағы адами қасиеті мен сапалы білімі — дамудың түп қазығы.

Конференцияда өткенге есеп беріліп, болашаққа жоспар құрылды.
Түркістан облысында мектеп оқушыларына орын тапшылығы жыл сайын артып келеді. Атап айтқанда, биыл 11-сыныпты — 24513 түлек тәмамдаған болса, 9-сыныпты — 38 мың бітірушінің 10 мыңға жуық түлегі колледжге оқуға құжат тапсыруда. Ал, бірінші сыныпқа 53 мың оқушы келеді деп күтілуде. Демек, мектепке келетін оқушы саны шамамен 18 мыңға артуда. Бұл мәселе өз кезегінде облысқа жаңа 184 білім ордасын салуды қажет етеді. Биыл 68 мектептің құрылысына 23,5 млрд теңге бөлініп ,ағымдағы жылдың соңына дейін 22 білім ордасы пайдалануға беріледі. Қалған 46 мектеп келесі жылға өтпелі. Осы және өзге де өзекті мәселелер жиынға арқау болды. Шара шеңберінде ұстаздар марапатталып, сый- сияпатқа бөленді.