Арыста жеті мыңға жуық үйдің құрылысы аяқталды, деп хабарлайды Түркістан облысы әкімінің баспасөз қызметі.
Әкімдіктегілердің мәліметінше, жарылыстан зардап шеккен қаланы қалпына келтіру кесте бойынша жүргізіліп жатыр. Бірақ бүгінгі таңда үй егелерінің келісім бермеуіне байланысты 53 баспанада құрылыс басталмаған. Бұл туралы журналистермен өткен баспасөз мәслихатында индустрия және инфрақұрылымдық даму бірінші вице-министрі Қайырбек Өскенбаев мәлімдеді.
«Арыста жалпы тұрғын үй саны — 8634. Төтенше жағдайдан кейін жөндеу жұмыстарын қажет ететіні 7197 құрайды. Ал 433 баспананы толық қалпына келтірілетін болады. Жалпы осы уақытқа дейін 6924 үйде жөндеу жұмысы толық біткен. Бұл — 90,7 пайыз. Бүгінгі таңда 101 жеке тұрғын үйде құрылыс жұмыстары басталған жоқ, оның 53 де үй иелері келісім бермей отыр», — деді Өскенбаев.
