АКТРИСА АЙША АБДУЛЛИНА ӨМІРДЕН ӨТТІ

    Бүгін Алматы қаласындағы М.Әуезов атындағы Қазақ мемлекеттік академиялық драма театрында қалың жұрт Халық әртісі Айша Абдуллинаны ақтық сапарға шығарып салады. Президенттің көңіл айту хатын Мәдениет министрі жеткізсе, Алматы мен Шымкент қаласы әкімдерінің көңіл айту хаты да оқылды. Бұл туралы Шымкент қаласы әкімінің кеңесшісі Қ.Құрманалиев Алматыдан хабарлады.

«Тарихта ізі қалған дара тұлғалармен кездесудің киелі орны – театр сахнасы» деп қазақтың айдыны Ғ.Мүсірепов айтқандай, театр әлемінде өшпестей із қалдырған сахна саңлағы, XX-шы ғасырдың басында – жаңа ғасырмен дүние есігін ашқан Айша Абдуллина анамыз өнердің майталманы.

    1916 жылы 26 желтоқсанда Алматы қаласындағы орта шаруа отбасында дүниеге келген Айша Абдуллина, анасынан жастай айырылып, нағашысының қолында тәрбиеленеді. Бала күнінен әсершіл А.Абдуллина 1933 жылы М.Әуезов атындағы Қазақ Мемлекеттік Академиялық драма театры жанындағы екі жылдық актерлер даярлайтын студияға түсіп, сол жылы қараша айының 13-і күні театрға әртіс боп қабылданады. Қазақтың қаймақтары – Ж.Шанин, А.Тоқпанов, Қ.Қуанышбаев, Е.Өмірзақов, Қ.Жандарбеков, С.Қожамқұлов, Қ.Бәйсейтовалармен қатар сахнада өнер көрсеткен А.Абдулина, болашақ жанғалы тұрған өнер жұлдызы екенін танытып үлгерді. XX-шы ғасыр зұлматы – Екінші дүниежүзілік соғыс кезінде қан майданға екі рет барып, жауған оқтың өтінде концерттік бригадамен бірге өнер көрсетіп қайтады. Қайсар мінезіне тума таланты үйлескен А.Абдуллинаға 1943 жылы «Қазақ ССР-іне еңбек сіңірген әртісі» атағын береді. Отбасы жағдайымен 1947 жылы Шымкенттегі облыстық драма театрына ауысқан жылдан бастап, тоқсан жасқа келгенге дейін сахна төрінде өнер көрсетті. А.Абдуллина классикалық, тарихи, бүгінгі күн тақырыбындағы спектакльдерден сан алуан тағдырлы кейіпкерлер галлереясын жасады. «Қыз Жібектегі» — Қыз Жібек, «Қозы Көрпеш – Баян сұлудағы» — Баян Сұлу, «Ер Тарғын» — Ақжүніс, «Қарақыпшақ Қобыландыдағы» — Қарлыға, «Асауға-тұсаудағы» — Катарина – әрқайсы өз алдында бір ғылыми ізденіске тұратын кейіпкерлерді сомдаған актрисаның өмірі – қазақ театр тарихына өнеге!..

    1958 жылы «Қазақ ССР-нің халық әртісі» құрметті атағын алған Айша Абдуллина, қоғамдық жұмыстарға белсене атсалысып, Оңтүстік Қазақстан облыстық кеңесіне және екі дүркін Шымкент кеңесіне депутаттыққа сайланып, ҚР Президенті Н.Ә.Назарбаевтың екі рет «Алғыс хатын» алған тарлан. Президент стипендиаты, «Парасат» орденінің иегері, Оңтүстік Қазақстан облысының «Құрметті азаматы» атанды.

Иісі қазақтың театр туын көпке желбіреткен абыз анамыздың топырағы торқа, жаны жәннәтта болсын деп отбасына қайғыра көңіл айтамыз. Халық әртісі Айша Абдуллина Алматы қаласындағы Кеңсай зиратына жерленбек.